बारन खे सिन्धी सेखारे संदनि दिमाग़ी शक्ती वधायो
हिक खां वधीक भाषाऊं जाणंदड़नि माण्हुन ऐं बारन में दिमाग़ी शक्ति वधीक हूंदी आहे। कैलीफोर्निया यूनिवर्सिटी में थियल हिक अध्ययन में इहो साबितु थियो आहे। कैलीफोर्निया यूनिवर्सिटी में हिन विषय ते अध्ययन कंदड़ एलेन बैलीस्टॉक जे अनुसार जेके माण्हू हिक खां वधीक भाषाऊं जाणनि था, उन्हनि खे हिमेशा पंहिंजे दिमाग़ खे अलर्ट रखणो थो पवे त कडहिं कहिड़ी भाषा में गाल्हाइणो आहे। हिक बे अध्ययन कंदड़ अल्बर्ट कोस्टा जे अनूसार बिनि या वधीक भाषाउनि ते नियंत्रण करण जी लागीती जरूरत जे करे दिमाग जो एक्जीक्यूटिव फंक्शनिंग सिस्टम बहतर तरीके सां कमु करे थो। वधीक भाषाऊं जाणंदड़ इनसानु हिक वक्त में हिक खां वधीक कम बहतर ढंग सां कंदा आहिनि।
सिन्धी बार सवलाईअ सां ब या बिनि खां वधीक भाषाऊं गाल्हाइण सां गडु पढ़ी लिखी सघनि था। कुझु साल अगु ताईं सभु सिन्धी बहुभाषी हुआ। हरको सिन्धी पंहिंजी मातृभाषा सां गडु हिंदी या बी काई प्रांतीय भाषा जाणंदो हो। मुम्बई में रहंदड़ केतरा सिन्धी त पंज भाषाऊं (सिन्धी, हिंदी, मराठी, गुजराती ऐं इंगलिश) जाणंदा हुआ।
घटि पढ़ियल ऐं अणपढ़ियल सिन्धियुन वापार में वडी कामयाबी हासिलु कई आहे। इन कामयाबीअ जे पुठियां सिन्धियुन जो दिमाग़ु ई आहे। सिन्धी जिते बि व्या पंहिंजी मातृभाषा सां गडु उतां जी भाषा बि सिख्या। वधीक भाषाउनि जी जाण बि सिन्धियुन जे तेज़ दिमाग जो कारणु थी सघे थो।
हाणे सिन्धियुन पंहिंजे बारन सां सिन्धीअ में गाल्हाइणु छडे डिनो आहे। माउ पीउ त ब ट्रे भाषाऊं जाणनि था पर संदनि बार हिक ई भाषा था गाल्हाइनि। मां पंहिंजे शहर में केतरनि सिन्धियुन खे सुञाणा जेकी टिनि भाषाउनि (सिन्धी, हिन्दी, इंगलिश)में गाल्हाए सघनि था पर संदनि बार सिर्फु हिक भाषा (हिंदी) ई जाणनि।
जेकडहिं शोधु कंदड़ एलेन बेलीस्टॉक ऐं अल्बर्ट कोस्टा जे अध्ययन ते विश्वासु कजे त सिन्धी पंहिंजे बारन खे पंहिंजी मातृभाषा सिन्धी न सेखारे संदनि दिमाग खे कमज़ोरु करे रहिया आहिन!
असीं इंगलिश सेखारिण लइ हजा़रें रुप्या खर्चु कयूं था। इहो जरूरी बि आहे छाकाणि त इंगलिश भाषा रोज़गार सां जुड़ियल आहे। पर सिन्धी भाषा सेखारिण में को बि खर्चु कोन्हे। सिर्फ नंढिपिण खां बार सां सिन्धी में गाल्हाइण सां बारु सिन्धी सिखी वेंदो। हिंदी ऐं इंगलिश सां गडु जे बारु सिन्धी बि सिखंदो त उन मां ब फाइदा त पका आहिन - पहिर्यों, बहुभाषी हुअण सां बार जी दिमागी़ शक्ती वधंदी ऐं बियों, बार जी सिन्धीअ जे रूप में सुञाणप काइमु रहंदी।
-गोपाल हासाणी
revivesindhilanguage@gmail.com
------------------------------
No comments:
Post a Comment