विख-Reviving Sindhi Language: 2009

विख -8
बाल गीतु - लक्ष्मण दुबे
रुसिणी - गोपाल हासाणी‍
पढ़ण लाइ हेठीं लिंक ते क्लिक करियो
http://docs.google.com/fileview?id=0B04DWr_wjawiMDA0N2JlOTUtMzM2ZC00OWIxLWE1ZGQtNDNiZjE3YTRjNjE4

Tuesday, December 1, 2009

विख-1

किथे गुम न थी वञे असांजी सुञाणप - वासुदेव 'सिंधु भारती'
ग़ज़ल - नारी लछ्वानी
जहिं घर उस न वञे , तंहिं घर डॉक्टर वञे - गोपाल हासाणी

विख-2

सिन्धी फौजीअ जी नज़र सां भारत -पाक सरहद जो दर्शन - कर्नल (रिटायर्ड) नारायण पारवाणी , तर्जुमो - भग॒वान बा॒बा॒णी

डुकंदो आउ - मुरली एन गोविन्दाणी

विख-3

सिन्धी फौजीअ जी नज़र सां भारत - पाक सरहद जो दर्शन - कर्नल (रिटायर्ड) नारायण पारवाणी , तर्जुमो - भग॒वान बा॒बा॒णी

मिठिड़ी बो॒ली - पारू चावला

भाई चैनराइ लुंडु 'सामी' - प्रो लछमण परसराम हर्दवाणी

जीवन गुलशनु - कमल प्यासी

विख-4

प्रार्थना - खीमन मूलाणी

असीं छो था खिलूँ ? -प्रो लछमण परसराम हर्दवाणी

सुकल बर्फ - गोपाल हासाणी

विख-5

भाषा ऐं लिपी - गोपाल हासाणी

ग़ज़ल - भग॒वान बा॒बा॒णी

विख-6

भारती वायुसेना जो जांबाजु सुर्मो फ़्लाइंग ऑफिसर प्रेम रामचंदाणी - वासुदेव 'सिंधु भारती', जयपुर

सिंधु माता - पहिलाज राइ 'मुसाफ़िर'

विख-7

भारती वायुसेना जो जांबाजु सुर्मो फ़्लाइंग ऑफिसर प्रेम रामचंदाणी - वासुदेव 'सिंधु भारती' जयपुर
प्रेम जी जोति - मुरली एन गोविन्दाणी

Monday, November 23, 2009

Download the Nirvanashtakam

Sunday, November 8, 2009

दादा साधू टी एल वासवाणीअ जो जनमु 25 नवंबर 1879 ते सिंध जे हेदराबाद शहर में श्री लीलाराम वासवाणीअ जे घर में थियो । दादा जनि जे जनम जो नालो थांवरदास हो । दादा जनि जो पूजु॒ पिता श्री लीलाराम वासवाणी देवी माता जो उपासकु हो ऐं सन्दसि माता गुरू नानकदेव जी सची सदिक्याणी ऐं भगि॒तियाणी हुई । हूअ नितु नेम सां प्रभात जो श्री जपु साहिब ऐं श्री सुखमनी साहिब जो पाठु कंदी हुई । घर जे अहिड़े घर्मिक ऐं भगि॒तीमय वातावरण जो बा॒लक दादा ते काफी प्रभाउ पयो ।

सिंध जे महान समाज सुधारक, निष्काम शेवक, सिन्धी सामाज जो सचो कोहीनूरु, आदर्शी अध्यापकु साधू हीरानंद आड॒वाणी बालक दादा खे स्कूल में उस्ताद जे रूप में नसीबु ‍थियो । जंहिं जो दादा जे विद्यार्थी जीवन ते असरु पयो।

दादा टी एल वासवाणी खे संदसि काबिलियत सबबु कराची कालेज में लेक्चरर मुकररु कयो व्यो। इन खां पोइ दादा कलकते जे विद्यासागर कालेज में प्रिंसीपाल थिया । दादा वासवाणी लाहोर जे दयालसिंघ कालेज, कूच बिहार जे विक्टोरिया कालेज ऐं पटियाला जे महेंदर कालेज में प्रिंसीपाल रही हज़ारें विद्या‍र्थियुनि जी राह रोशन कई ।

बा॒लक बा॒लिकियुनि खे सची विद्या डि॒यण लाइ दादा हेदराबाद में मीरां स्कूलु खोल्यो जिते विद्यार्थियुनि खे पुस्तकनि जे अभ्यास सां गडु॒ सची सिख्या पिणि डि॒नी वेन्दी हुई जीअं हू अगि॒ते हली आदर्शी इनसान बणी कौम जो कंधु उचो कनि । मीरां विद्या हलचल हज़ारनि खे ठाहियो ।

29 वर्हियनि जी उमिरि में दादा बर्लिन जे विश्व धर्म समेलन में शरीक थिया । दादा जो व्याख्यानु बु॒धी उतां जा लोक मंत्रमुग्ध थी व्या । दादा वासवाणी सिन्ध जो टैगोर हो । जीअं गुरूदेव टैगोर विश्वभारती शांती निकेतन जी स्थापना करे विद्या जी नईं जोति ज॒गाई तीअं दादा मीरां स्कूल ऐं मीरां कालेज खोले विद्या जे खेत्र में नईं सुजागी॒ आंदी ।

देश जे विरहाङे खां पाइ दादा पूने में अची मीरां स्कूलु ऐं मीरां कालेज खोल्यो । पूने स्टेशन जे भर्सां साधू वासवाणी मिशन जो स्थानु हिकु तीर्थु स्थानु बणिजी प्यो आहे जिते देश विदेश में श्रद्धालू ईंदा आहिनि । पूने में साधू वासवाणी मिशन पारां स्कूल, कालेजनि सां गडु कैंसर, दिलि ऐं अखियुनि जी बीमारियुनि जे इलाज लाइ अस्पतालूं बि हली रहियूं आहिनि ।

साधू वासवाणी मिशन में नेम सां रोज़ु सत्संगु थींदो आहे । अलग॒ अलग डीं॒हनि ते सिन्धी, हिन्दी ऐं इंगलिश में सत्संगु थींदो आहे ।

16 जनवरी 1966 ते पूने में भारत जो महान संतु साधू वासवाणी ब्रह़मलीन थियो ।

दादा साधू वासवाणीअ जे जनम डीं॒हं 25 नवम्बर खे 'मीटलेस डे' जे रूप में मल्हायो वेंदो आहे ।

Monday, November 2, 2009

वाह सिन्धी वाह

भोपाल अजु॒ 2 नवम्बर आहे .अजु॒ गुरु नानक जयंती ते मूं घणा साल पोइ प्रभात फेरी डि॒ठी .भोपाल जे विजय नगर ऐं ओ़म नगर जे सिन्धी भावरन, भेनरून ऐं खास कर नंढन बा॒रन छा त मौज मचाई, डि॒सी दिल खुश थी वई।पूरा ट्रे किलाक मूं प्रभात फेरी जे आनंद खे माणियो. भाऊ गोपाल हासाणी बि मूंखे गडि॒जी वया. नंढा बा॒र फेरी जे अगि॒याँ हली ज॒णु असान्जी रहनुमाई करे रहिया हुआ .फटाका बा॒रींदा पंहिंजी हिक अलग॒ ही मौज में हुआ . सुबुह 6.00 बजे धन गुरु नानक सारा जग॒ तारीया ॥ऐं नानक शाह जा भजन गा॒ईन्दा श्रद्धालु प्रभात फेरी सां निकता. प्रभात फेरी सजी॒ कालोनी में घुमंदे ओ़म नगर पहुती , जिते ओ़म नगर में रहंदड़ सिन्धी परीवारन गुरु नानक साहब जी सवारी जो श्रधा ऐं दिल सां स्वागत कयो.प्रसाद बि विर्हायो वयो . सभिनी खां खास गा॒ल्ह इहा हुई त असां जूं भेनर मधुर भज॒न ऐं गीत गा॒ए रहियूं हुयूं।सभु भाउर बि सुर में सुर मिलाए रहिया हुआ .
अजु॒ जेको आनंद आयो पन्हिंजे समाज जी एकता ऐं भावना डि॒सी , उनजो अहवाल डि॒यण जी कोशिश कई आहे , अखर कोन था मिलन जो पूरी खुशी बु॒धाए सघां .अजु॒ ऐतरो ई चवण चाहिंदुस - असान्जो सिन्धी समाज सभिनी धर्मं ऐं पंथन में गहिरो विश्वास ऐं आस्था रखे थो , असान्जी दिल वडी॒ आहे , पाण खे हिक धर्म ऐं पंथन ते ई महदूद कोन रखियो आहे . भारतवासी असान्जी भावना डि॒सी अभिभूत थीन्दा हूंदा पर अजु॒ खुली तारीफ केर थो करे ?को तारीफ करे न करे असीं पंहिंजी परम्परा ऐं संस्कृति सां जुडियल आहियूं ।जय झूलेलाल।

Sunday, November 1, 2009

स्वामी टेऊंराम साहिब जा वचन

वक्तु जेको गुज़री वञे तंहिंखे यादि कीन करि।

वक्तु जेको अचणो आहे, चिन्ता तंहिंजी कीन करि।

जेकी करे सो परमात्मा, राज़ी उन ते तूं रहु।

जेकी बणियो आहे सो सभु ठीकु, इहो ई सदा चवंदो रहु।

Saturday, October 31, 2009

सिंध जी पदमिणी

हीअ उन वक्त जी गा॒ल्हि आहे जड॒हिं सिन्ध देश ते मीरन जो राजु॒ हो, जिनि खे तालपर करे सडीं॒दा हुआ। दीवान गिदूमलु मीरन जी दरबा॒र में मीर गुलाम अली तालपर जे राज॒ में वडो॒ वज़ीरु हो। हू हेदराबाद में पंहिंजे भाउरन ऐं मिटन माइटन समेत रहंदो हो। दीवान गिदूमल खे पुट जो ओलादु कोन हो। फक़त हिक सिकीलधी धीअ हुअसि जा सुशील, गुणवानु ऐं सूंहं में बिल्कुल सर्सु खू़बसूरत हुई । छोकिरीअ जे सूंहं जी हाक बु॒धी मीरु गुलाम अली मथसि मोहित थी प्यो। नेठि हिक डीं॒हुं राज॒ दरबा॒र में मीर बिना हटक हब॒क जे बिल्कुल खुल्यो दीवान गिदूमल खे चई डि॒नो त " मां तुंहिंजी छोकिरीअ सां शादी करणु थो चाहियां।"

दीवान गिदूमल खे मीर जे तेज़ सुभाअ जी जाण हुई । अक़ुलमंदीअ सां जवाबु डि॒नाईं त मां सलाह करे उन जो जवाबु बि॒नि टिनि डीं॒हन में डीं॒दुसि। इन बैदि दीवानु मायूस ऐं उदास चहरे सां घर वापस आयो ऐं सजी॒ गा॒ल्हि अची पंहिंजी ज़ाल सां कई । कमरे जी खुल्यल खिड़कीअ मां समूरी गा॒ल्हि संदसि धीअ बु॒धी वरती। कु़रबानीअ जी पुतली संदसि धीअ बिनां डप डाउ जे हिमथ ऐं होसिले सां माउ पीउ जे साम्हूं अची चयो त मूं समूरी गा॒ल्हि बु॒धी वरती आहे । घबि॒राइण जी का बि ज़रूरत कोन आहे। चवण लगी॒ त बाबा मूं हिन्दू वीर नारियुनि जो इतिहासु पढ़ियो आहे। हू धरम ऐं इज़त खा़तिर क़ुरबान थ्यूं आहीनि । मां वरी उन्हनि खां पोइते कीअं पवंदसि। तव्हां का बि चिन्ता न करियो।

धीअ जी दिलेरी ऐं हिमथ जो अहिड़ो जवाबु बु॒धी दिलि इ दिलि में पिणसि खेसि साराहण लगो ऐं मथसि फखुरु महसूसु कंदे पाण सां गडु॒ आंदल ज़हर जी पुड़ी मायूस दिलि ऐं ड॒कंदड़न हथनि सां धीअ जे हवाले कयाईं जंहिं बरवक्त प्याले में पाणीअ में मिलाए मुरकंदे हिक इ गी॒त सां पी करे पंहिंजो अंतु आणे छडि॒यो ऐं वीरगती प्राप्त करे सिन्ध जे इतिहास में हिन्दुन नारियुनि जो नालो अमर कयो।

बि॒ए डीं॒हुं इहा खबर मीर खे पेई । हुन पंहिंजी मुराद पूरी न थींदे डि॒सी अंदर में सड़ी पची व्यो ऐं हिकदम गुसे में लाल थी दीवान गिदूमल खे राज॒ दरबा॒र में घुराए खेसि माराए छडि॒यो।

जीअं चितोड़ जी राणी पदिमणीअ पंहिंजे धरम ऐं इज़त जे बचाअ खातिर पंहिंजी जान क़ुरआन कई हुई तीअं दीवान गिदूमल जी हिन वीर कन्या बि पाणु क़ुरबानु कयो। इन करे खेसि सडि॒यो वञे थो ' सिन्ध जी पदमिणी' ।

Thursday, October 22, 2009

इएं कीअं थो थी सघे

कुझु डीं॒हं अगु॒ घर में वेठो होसि ऐं कुझु लिखी रहियो होसि त घरवारीअ घंटी बु॒धी दरवाजो खोल्यो । कंहिं सां गा॒ल्हाए यकिदमि आवाजु डि॒नाईं सांईं तव्हां सां केरु मिलण आयो आहे । मां लिखण जी टेबिल तां उथी बा॒हिर दरवाजे ते आयुसि । डि॒ठुमि त हिकु वीहें एकिवीहें सालनि जो जवानु दरवाजे ते बीठो हो । मां साणसि डां॒हुं निहारियो । हुन हिंदीअ में पुछियो राधाकृष्ण भागि॒या तव्हां आहियो । मां खेसि कंधु लोडे॒ हा कई ऐं खेसि अंदर अचण ऐं कोच ते वेहण लाइ चयो । हू अंदर अची वेठो ।

मुंहिंजी धरमपत्नी हुन लाइ बिसकेट ऐं पाणी टेबल ते रखी वई । मूं खेसि पाणी पीअण लाइ चयो । हुन पाणी पीतो ऐं टूटी फूटी सिन्धीअ ऐं हिंदीअ में चयो, मूंखे खबर पई त तव्हां सिन्धी सेखारींदा आहियो सो मां तव्हां वटि सिंधी सिखण लाइ आयो आहियाँ । संदसि नालो पुछियो, जंहिं मां मालूम थ्यो त हू सिंधीअ माउ जो सिंधी बा॒रु हो । मां खांउसि हींअ अचानक सिंधी सिखण जी चाह ऐं अञां ताईं सिंधी न अचण जो कारणु पुछियो । हुन वरी अधो गाबरी सिंधी ऐं हिन्दीअ में जवाबु डि॒नो । नंढे खां ई अंगरेजी स्कूल में दाखिल कयो वयुसि । शुरूअ खां ई ममी ऐं पपा घणे भाङे अंगरेजीअ में ऐ कड॒हिं कड॒हिं हिंदीअ में गा॒ल्हाईंदा हुआ । मुश्किल सां डा॒डी॒ ऐं डा॒डे॒ जे वातां के सिंधी अखर बु॒धण में ईंदा हुआ । घर जे वातावरण करे हू पिणि आहिस्ते आहिस्ते हिंदीअ में गा॒ल्हाइण लगा॒ । मां सुठी अंगरेजी गा॒ल्हाईंदो आहियां तंहिं करे मूंखे पाण ते फखुरु थींदो हो । किनि छोकरनि छोकरियुनि , किनि जालुनि खे जे सिंधी गा॒ल्हाईंदो बु॒धंदो होसि त खेनि पुठिते पयलु ऐं घटि समझंदो ऐं शायद नफरत बि कंदो होसि ।

मां खेसि ध्यान सां बु॒धी रहियो होसि । मूं संदसि डांहुं अजब में निहारींदे पुछियो त पोइ सिंधी सिखण जो वीचार अहिड़े माण्हूअ खे कींअं आयो । हुन कंधु हेठि झुकाईंदे जवाबु डि॒नो, दादा गा॒ल्हि हिन रीति आहे मां इंजिनीयरिंग कालेज में पढ़ंदो आहियां । हिन महिने जे पहिरें 15 डीं॒हनि में असांजी बैंगलोर में ट्रेनिंग हुई । हुन में बि॒यनि कालेजनि ऐं शहरनि मां बि कुझु शागिर्द आया हुआ ।असां अटिकल 25 शागिर्द ऐं 3 उस्ताद हुआसीं ।हिक डीं॒हुं इएं थियो त विंदुर ( एंटरटेनमेंट ) जे वक्त में उस्ताद चयो त हर हिक खे पंहिंजी मातृभाषामें हिकु गीतु बु॒धाइणो आहे ऐं सभ खां पहिरीं पाण बंगाली भाषा में नंढिड़ो पर तमामु मिठो गीतु गा॒ए बु॒धायो ।मूंखे लगो॒ त सभिनी खे थोरे ई को मातृभाषा में गीत ईंदा हूंदा । सो केतिरा गा॒ईंदा ऐं उन खां वधीक न गा॒ईंदा ।

पर मुंहिंजो अंदाजो ग़लत निकितो । सभई पंहिंजे वारे ते मातृभाषा में गीत गा॒इण लगा॒ । पोइ को पूरो गीतु त को अधूरो को तमाम सुठे सुर में भाव विभोर थी त को साधारण सुर में । पर हरको पंहिंजी मातृभाषा में गीतु गा॒ईंदो खुश पिए नज़र आयो । पहिरीं मां निश्चित हुउसि पर हाणे मुंहिंजी चिंता वधण लगी॒ । मूंखां अगु॒ हिक जर्मन ऐं हिक जापानी शागिर्द जो वारो आयो । हुननि बि पंहिंजी मातृभाषा में झूमंदे गीत गाया ।

हाणे मुंहिंजो वारो । मूंखे गा॒इण लाइ इशारो कयो । मां हको ब॒को थी वयुसि । मूं चयो त तव्हांखे हिंदी या अंग्रेजीअ में गीतु बु॒धायां । सभिनी जोर सां नो नो चयो । उनते उस्ताद चयो त ठीक आहे तोखे गीतु न थो अचे त हिकिड़ा अठ ड॒ह जुमला पंहिंजी मातृभाषा में गा॒ल्हाइ । मूं जड॒हिं शरम सां चयो त मूंखे पंहिंजी मातृभाषा सिंधीअ में गा॒ल्हाइणु न ईंदो आहे त सभिनी खे अजबु लगी॒ वयो । केतिरनि जी जुबान मां हिकदम निकतो, हाउ इट केन बी ? इएं कीअं थो थी सघे ? सभई मूं डां॒हु घूरे अजब ऐं अविश्वास में निहारे रहिया हुआ । मां शरम खां पाणी पाणी थी वयुसि । मूंखां पोइ ब॒ ज॒णा बि॒या हुआ । उन्हनि पिणि तमिल ऐं कछी बो॒लीअ में गीतु गा॒तो ।

कार्यक्रम पूरो थ्यो पर मूंखे लगो॒ मां सभिनि जो डो॒ही आहियां ऐं सभई अख्यूं मूंखे घूरे निहारे रहि‍यूं आहिनि । बाकी ट्रेनिंग जे डीं॒हनि में कुझु शागिर्द खास मूंसां गडि॒जण आया ऐं पुछण लगा॒ त सचु पचु मूंखे पंहिंजी मातृभाषा न ईंदी आहे । हू इन गा॒ल्हि ते विश्वास न कंदे चवनि प्या, 'इएं कींअ थो थी सघे ?'

उन डीं॒हं जी उन बेइजती ऐं दुख मां पैदा थियल गैरत मां मूं पको कयो त मां पहिरियों कमु कंदुसि त वञी सिंधी सिखंदुसि ।घर अची किनि खां पुछा कई । उन्हनि बु॒धायो त तव्हां सिंधी सेखारींदा आहियो सो तव्हां वटां सिंधी सिखण आयो आहियां ।

मूं प्यार मां संदसि मथे ते ऐं पुठीअ ते हथु फेरींदे चयो पुट का बि चिंता जी गा॒ल्हि कान्हे । देर आयो दुरस्त आयो । मां तोखे 15 डीं॒हनि में सिंधी सेखारींदुसि । हू खुश थी वयो । बि॒ए डीं॒हं खां ई सिंधी सिखण अचण लगो॒ । बा॒रु तमामु होशियार हो । संदसि गैरत हुन में जान फूकण जो कमु करे रही हुई । हू खूब महिनत करण लगो॒ । ड॒हनि डीं॒हनि अंदर ई हू सिंधी गा॒ल्हाइणु, पढणु ऐं के कदुर लिखणु सिखी वयो । में खांउसि पुछियो पुट छा ड॒हनि डीं॒हनि में केरु सिंधी सिखी थो सघे ?

खुशीअ मां मुस्कराईंदे जवाबु डि॒नाईं, 'हा इएं थी थो सघे ।'
---------------------------राधाकृष्ण भागि॒या , मुंबई

Sunday, October 18, 2009

नौजवान पीढ़ी ऐं सिन्धियत जी हलचल

मां डि॒सी रहियो आहियां त असां जी सुजागु॒ ऐं बु॒धीमानु नौजवान पीढ़ी पंहिंजी सिन्धी भाषा, साहित्य ऐं संस्कृतीअ खे ज़िदह रखण लाइ सरगरमु थी रही आहे ।

इहा फखुर जी गा॒ल्हि आहे त नौजवान पीढ़ीअ में पंहिंजी सांस्कृतिक विरासत खे सहेड़ण लाइ नईं चेतना जागी॒ रही आहे ऐं हू पंहिंज्युनि जड़ुनि सां जुड़ण जी कोशिश करे रही आहे ।

भारत जे शहर-शहर में नयुनि युवा संस्थाउनि जो बर्पा थियणु, माहवार, टिमाही ऐं साल्यानी पत्रिकाउनि ऐं स्मारिकाउनि जो प्रकाशनु ऐं सांस्कृतिक कार्यक्रमनि जी धूम इन हकीक़त जो सबूतु आहे ।

अजु॒ जड॒हिं गैर समाजी अनासर ( असामाजिक तत्व ) सिन्धी समाज ते बेबुन्याद ऐं बेहूदा इल्ज़ाम हणी बदनाम करण जी साजिश रचीनि था ( हवालो इंडिया टुडे वगैरह ) त समूरो सिन्धी समाज , खासि करे नौजवान तबिको, उनजी ज़ोरदार निंदा ऐं विरोधु करण लाइ यकमुश्त थी वञे थो ।

राष्ट्रगीत में 'सिन्ध' अखरु हटाइण जे सुवाल ते सिन्धी समाज जे नाराज़िपे (आक्रोश) जो ज्वालामुखी फुटी पियो । चइनि तर्फनि खां विरोध जा सुर गुंजण लगा॒ । विदेश जे सिन्धियुनि बि गुसे जो इज़हारु कयो । पंहिंजे वर्से (विरासत) जे बचाव लाइ हज़ारें हथ मथे उथिया । एकता जे इन मुजा़हिरे (प्रदर्शन) दिलि खे गदगदि करे छडि॒यो
इहा जाग्रिती ऐं सुजागी॒ डि॒सी मुंहिंजो विश्वासु अञा बि पुख्तो थी वेन्दो आहे त सिन्धी समाज बेजानु या घोर निंड में सुतलु कोन्हे, बल्कि हू पंहिंजो शानु ऐं स्वाभिमानु, पंहिंजी सुञाणप ऐं वुजूदु काइमु रखण लाइ सुजागु॒ रही, कशमकश कंदो रहे थो ।

असांजे नौजवाननि जो होसिलो हमेशा बुलंदु रहे, इन्हीअ शुभकामना सां मां उन्हनि सभिनी समर्पित युवा साथियुनि जो अभिनंदनु करियां थो जेके पंहिंजनि हथनि में 'सिन्धियत जो झंडो' सोघो झले, पंहिंजी मंज़िल-मक्‍सद डां॒हुं वधंदे, अहिमु भूमिका निभाइण जी कोशिश करे रहिया आहिनि ।

नौजवाननि खे इहा गा॒ल्हि यादि रखणु घुरिजे त अगि॒ते हली खेनि ई सिन्धियत जी हलचल जी अगु॒वानी करिणी आहे । इन लाइ खेनि हींअर खां ई वठी सिन्धू सभ्यता, संस्कृती , लोक कला, इतिहास, साहित्य ऐं भाषा सां वास्तो रखंदड़ु समूरो ज्ञानु हासुलु करे माहिरु ऐं काबिलु बणिजण जी ज़दोजहद करिणी पवंदी, जीअं हू ईंदड़ पीढ़ीअ जी रहनुमाई करे सघनि ।

नौजवान पीढ़ी सिन्धी कौम जे आइंदे जो आधारु आहे , करंधे जो हडो॒ आहे जेकड॒हिं हूअ पंहिंजे फर्ज खां गुथी त पोइ सिन्धियत जे वण जी टारी-टारी, पनु-पनु, टिड़ी-पखिड़िजी वेन्दो । अहिड़ीअ तरह असांजो वुजूदु ई खतमु थी वेन्दो ऐं इन जी जिमेदारु नौजवान पीढ़ी ई थींदी ।

यादि रहे त असांजे बुजु़र्गनि कष्ट-कशाला सही, पंहिंजो रतु सतु डे॒ई, सिन्धियत जे गुलिस्तान खे सरसब्‍ज़ु रख्यो आहे । हाणे उहे माल्ही आहिस्ते आहीस्ते रमंदा पिया वञनि । इन खां पोइ नौजवान पीढ़ीअ जे प्रतिभाशाली ऐं उर्जावान शख्सनि खे ई सिन्धियत जी मशाल हथनि में झले, मुश्कलातुनि ऐं आपदाउनि जे अंधेरे खे चीरींदे, स्वाभिमान ऐं आत्मविश्वास सां अगि॒ते कदमु वधाइणो पवंदो ।

असांजो नारो हुअणु घुरिजे: ' असीं सिन्धी-सदाईं गडु॒ ।'

हिन्दी साहित्यकार जयशंकर प्रसाद चयो आहे : ' जेका जाती जेसिताईं मरण लाइ तयारु रहंदी, उनखे तेसिताईं हिन धरतीअ ते जीअण जो अधिकारु रहंदो ।

---------------------------वासुदेव 'सिन्धु-भारती', जयपुर

सि‍न्धियुनि लाइ हिक सुठी खबर

हेठीं वेबसाइट तां देवनागरी ऐं अरबी लिपीअ जो सिन्धी यूनिकोड कीबोर्ड ऐं फाँट डाउनलोड करे सवलाइअ सां वर्ड, मेल ऐं ब्लॉग ते सिन्धीअ में लिखी सघो था ।
http://www.ildc.gov.in

सिन्धीअ जी सुञाणप

सिन्धी बो॒ली ई सिन्धियुनि जी सुञाणप आहे।
भारत जे संविधान में सिन्धीअ जो कंहिं जातीअ जे रूप में वर्णन कोन्हे । भारत जे संविधान जे अनूसार सिन्धी उहो आहे जेको सिन्धी गा॒ल्हाए थो।
सिन्धी समाज हिक भाषाई समाज आहे । सिन्धी न का जाति आहे न धरमु
असीं तेसींताईं सिन्धी आहियूं जेसींताईं सिन्धी गा॒ल्हायूं था ।
असांजी प्राचीन संस्कृतीअ जी सुञाणप बि असांजी मातृभाषा सां आहे ।
समूरी दुनिया में हर भाषा ऐं हर स्कूल में सिन्धू घाटी सभ्यता जे बारे में पढ़ायो वञे थो । असीं सिन्धी इन सभ्यता जा वारिस आहियूं ।
जेकड॒हिं अव्हां पाण में सिन्धीअ में गा॒ल्हाईंदा त गु॒झियूं गा॒ल्हियूं बि॒या समझी न सघंदा।
बि॒यूं बो॒लियूं जेतिरियूं सिखिजनि बहतर, पर पंहिंजी मातृभाषा खे विसारणु न घुरिजे । इहा पहिरीं सिखणु घुरिजे ।
टिड़ियल, पखिड़ियल, विखिड़ियल सिन्धी समाज खे पंहिंजी मातृभाषा ई माल्हा जियां पिरोए सघे थी ।
सिन्धियत जी हिफाजत लाइ पंहिंजे रस्मुनि रिवाज़नि खां मुंहुं न मोड़ियो, पर वक्त ब वक्त मल्हायो।
सिन्धी बो॒लीअ खे काइमु रखण जो सिर्फ हिकु इ तरीको आहे- पंहिंजे बा॒रनि सां सिन्धीअ में गा॒ल्हाइणु ।
वैज्ञानिकनि सिद्ध कयो आहे त बा॒रु जेतिरियूं वधीक भाषाऊं सिखंदो, हुनजो दिमाग़ ओतिरो तेजु़ थींदो ।

Wednesday, October 14, 2009

डि॒यारी

जग॒ मग॒ दीप ब॒रिया चौधारी,
आई डि॒यारी।

हिकिड़ो दीपु दया जो बा॒रियो,
दीन दुखियुनि जी दिल खे ठारियो,
तड़े कढो जग॒ जी हर कुंड मां,
दुख जी ऊंदहि कारी,
आई डि॒यारी।

जोति न्याअ जी काथे बा॒रियो

अन्याअनि जी ऊंदहि टारियो,
दीन दुखियुनि जे जीवन में जिअं,
अची वञे त बहारी,
आई डि॒यारी।

दीपकु बा॒रियो इनसानियत जो,
मिटे अंधेरो हेवानियत जो,
सुख जो सुझंदो घर घर में थिए,
मिटिजे दुखु बीमारी,
आई डि॒यारी।

-----------------खीमन यू मूलाणी, भोपाल

Tuesday, October 13, 2009

सचल सरमस्त जी कविता

सिन्धी साहित्य जे आकास में चिमकंदड़ सितारनि में सूफी कवी सचल सरमस्त जो नालो मुख्यु आहे। दराज़नि सिन्धु जो हीउ दरवेशु मालिक जी मस्तीअ में सदाइ मस्तु रहंदो हो ।
सिन्धी अदब ऐं साहित्य सां लागा॒पो रखंदड़ भाउर ऐं भेनरुनि लाइ खुशीअ ऐं फखुर जी गा॒ल्हि आहे त सिन्धीअ जी मूल लिपी देवनागरीअ जा हिमायती ऐं प्रचारक प्रो लछमण हर्दवाणी सिन्धी सूफी कवी 'सचल सरमस्त जी कविता' नाले सां हीउ किताबु प्रकाशित कयो आहे । टपाल खर्च सूधो सिर्फ 50 रुप्या हेठीं एड्रेस ते माकिले किताबु घुराए सघिजे थो ।
प्रो लछमण हर्दवाणी,
'कविता' प्रोफेसर कालोनी,
सावड़ी, अहमदनगर-४१४००३ महाराष्ट्र
मोबाइल-09890693931

ग़ज़ल

पाण रुअण में पूरो मां ,
गो॒ढ़ो कंहिंजो कीअं उघां ।

खूब दुखायमि दिल हुनजी,
हाणे वेठो पाण लुछां ।

केडा॒ वेझा माइट सभु ,
को बि न वेझो पर तिनि मां।

भीड़ भरी हिन दुनिया में ,
कंहिंजो साथु न आ कंहिंसां।

याद अची थी छुहण लगे॒ ,
केड॒नि कोटनि में बि लिकां।

सुकलु सुकलु आ, ही जीवनु,
रंग में कंहिंजे काश भिजां॒ ।

ढोल वज॒नि ऐं छे‍रि वजे॒ ,
पेर खज॒नि, मां खूब नचां ।

मोटर , कारूं , स्कूटर ,
चेड़ाइनि , जे पंधु हलां ।

असरु न कोइ अखरनि मंझि,
उधिमा दिल जा कीअं लिखां ।

-----------नारी लछवाणी, भोपाल

Saturday, October 10, 2009

नशो नींहं जो

कयूं अहम खे गुम, दिल सां दिल मिलायूं,

अचु त नींहं वारी का दुनिया वसायूं ।

खतमु कयूं हिकदम सभु शिकवो शिकायत,

न तानो, न तुनको, न तीर हलायूं ।

सल्यूं हिक बि॒ए सां पंहिंजीअ दिल जा राज़,

असुलु खीरु खंडु थियूं, कुझु बि न लिकायूं ।

रुसण खे छडे॒ हाणि वधूं परचाअ डे॒ ,

मजो आहि मुहबत में दुनिया खे बु॒धायूं ।

अगि॒ में त हुआसीं बईं ज॒णुकि नादान,

हली नेकु हाणे समझदार सडा॒यूं ।

विधाता रचियो आ, ही रिश्तो असांजो,

जनमनि जो उन खे, असीं ब॒ईं बणायूं ।

..................डॉ रूपकुमार 'घायल' भोपाल

Friday, October 9, 2009

अनमोल वचन

बि॒ए जे सुख दुख में शामिल थियणु मनुषधर्मु आहे ।

शेवा आहे सुंदरु ग॒हिणो ।

सचु परमात्मा जो रूपु आहे ।

विश्वासु मनुष खे ब॒लिवानु बणाए थो ।

जेकी माण्हूं पाण खे वडो॒ समझंदा आहिनि, उहे कड॒हिं बि वडा॒ कोन हूंदा आहिनि ।

बि॒ए जे मन खे डु॒खाइणु माना भग॒वान जो मनु डु॒खाइणु ।

तव्हां खे दोस्त करिणा आहिनि त पहिरीं बि॒यनि जा दोस्त बणिजो ।

क्रोध खे साड़ियो न त क्रोधु तव्हां खे साड़े छडींदो ।

तूं सुखु चाहीं थो त वञी बि॒यनि खे सुखी करि ।--साधू वासवाणी