सिन्धी नींगर-नींगरी, मड़दु हुजे या नार,
चंड जियां चिमके सदा, चहिकन प्या चोधार।
वडी सूंहं अपार, साईंअ आ सिन्धियुन में।
धरजीअ ते या चंड ते, सिन्धी हूंदो जिति,
चइन दीवारुन मथां, पंहिंजी हूंदसि छिति।
रुले हिति हुति, बेघर को बि न सिन्धियुन में।
सिन्धी खाए कढ़ी चांवर, दाल ऐं पकवान,
बीह पटाटा, साई भाजी, सिन्धीअ जी पहिचान,
िडसे थो भगवानु, सिन्धी सदा महिमान में।
सिन्धी माण्हू वणजारो, रखे न कंहिं सां वेरु,
बर-पटु साओ थी पवे, जे रखे सिन्धी पंहिंजो पेरु,
घुरे सदाईं खेरु, सभिनी जो संसार में।
हलनि बई गडु जे सदा, सिन्धी ऐं स्वाभिमानु,
हथु पसारणु कंहिं अगियां, न सिन्धी समुझे शानु,
अहिड़ो उमदो इनसानु, गोल्हियो मिले न जग में।
सिन्धी दान पुञ कोडिया, रखन सभ जी ओन,
न डिसन ज़ाति पाति , कनि नफरत कोन,
थी पवन जेकर सोनु, जे परची हलनि पाण में।
--मोतीराम हीरानंदाणी 'मोती'
('सुहिणी सिन्धी रोशनी' तां वरतलु)
No comments:
Post a Comment