म.प्र. सिंधी साहित्य अकादमी जे सहयोग सा ‘‘सिन्धु’’ पारां यादगार पेशकश ‘‘रुगो पेर खणु........’’

सिंधीअ जे मायनाज़ शायर नारायण श्याम जे 91 जन्म डीं॒हं जे मोक़े 22-07-2012 ते भोपाल जी प्रमुख साहित्यक संस्था ‘‘सिन्धु’’ पारां मध्यप्रदेश सिंधी साहित्य अकादमीअ जे सहयोग सां ‘‘रुगो पेर खणु......’’ सिरे सां यादगार प्रोग्राम पेश कयो वियो।

            कार्यक्रम जो शुरूआती संचालन कंदे मोहित शेवाणीअ आयल महिमानन खे नारायण श्याम, माता सरस्वती ऐं संत हिरदाराम जे फोटो ते माल्यार्पण करे दीप बा॒रण जी नींढ डि॒नी। डॉ. विनोद आसूदाणी(कार्यक्रम जो स़दर), डॉ.विम्मी सदारंगाणी (कार्यक्रम जी मुख्य महिमान), अर्जुन चावला (अलीगढ़), कैलाश शादाब(रायपुर), अशोक जमनाणी (होशंगाबाद) गडि॒जी करे इहा रस्म निभाई।

            गीत-संगीत जे पहिरियें भाङे जी शुरूआत कई पूजा॒ टहिल्याणी ऐं टीना लछवाणीअ हूंदराज दुखायल जी रचियल प्रार्थना ‘साईं ओ साईं महिर वसाईं’ सां उनखां पोइ जतन वासवाणी बि हूंदराज दुखायल जी अमर रचना ‘पखीअड़ा दूर तुंहिंजी मंजि़ल’ खणी पेश थियो। जतिन 18 सालन जो नौजवान आहे हू तबलो ऐं हारमोनियम बि सुठे नमूने वजा॒ईंदो आहे। टियें नम्बर ते आई कलाकारन में सभ खां नंढी बा॒रिड़ी साक्षी सताणी ’खेनूअड़ो डे॒ अम्मां’ लोक गीत खणी। हिन नींगर जी कंहिं स्टेज ते इहा पहिरीं पेशकश हुई पर संदस आत्म-विश्वास मज़बूत हो ऐं पेशकश बु॒धंदड़न खे झूमायो। शुभी शुक्ला ग़ैर-सिन्धी बा॒लिकी आहे पर हुन बि पक्के आत्म विश्वास सां लोकगीत ‘हिड॒कीअ मथां मूंखे आई हिड॒की’ पेश करे श्रोताउन खे ताड़ियूं वजा॒ए वाह! वाह!! करण लाइ मजबूर कयो। उनखां पोइ आई रोशिनी तनवाणी नारायण श्याम जो गीत ‘नईं आहे नित नाज़ वारन जी बाली’ खणी ऐं छहें नम्बर ते आयो पक्को पुख़्तो गायक नारी लछवाणी पंहिंजी धीउ रचना लछवाणीअ सां नारायण श्याम जी ई रचना ‘चांदनी रात ऐं अकेलाई’ खणी, जंहिं श्रोताउन खे संगीत जे मेठाज, शायर जे कल्पना जी उडा॒म ऐं गीत जी गहिराईअ जी जो रसु वठायो। गीत-संगीत जे पहिरियें भाङे जो आखि़री गायकु हो दिलीप लालवाणी, हुन बि नारायण श्याम जी रचना ‘दूर,दूर, दूर अल्ला अखि छा थी गो॒ल्हे’  मस्तीअ भरे अंदाज़ में पेश करे श्रोताउन खे झूमायो। इन्हन गीतन जे दौरान कार्यक्रम जी मुख्य महिमान डॉ.विम्मी सदारंगाणी नारायण श्याम जे रचनाकर्म ते रोशिनी बि विझंदी रही।

            गीत-संगीत जे पहिरियें दौर खां पोइ वारो आयो अखिल भारत सिंधी कवि सम्मेलन जो। शुरूआत कई बैरागढ़ जे शाइर रमेश तनवाणीअ। हूंअ त रमेश हिकु सुठो गायकु आहे पर इन सां गडु॒ कविताऊं रचींदो बि आहे। कंहिं मंच तां पहिंजी कविता पढ़ण जो हीउ संदस पहिरियों मोक़ो हो पर नारायण श्याम ते लिखियल संदस रचना खे सभिनी जी साराह मिली। कनयो शेवाणी नओं उभिरंदड़ शायर आहे हुन बि पंहिजन ग़ज़लन ऐं वाईअ सां बु॒धंदड़न खे मुतासि़र कयो। कन्हैयालाल मोटवाणी ‘मांदो’ छंद में लिखण वारो सुठो शायर आहे संदस ग़ज़ल बि श्रोताउन जे दिल ते असरु करण वारा हुआ। नई कविता जो जा॒तल सुञातलु नालो मोहन गेहाणी बि पहिरियों दफ़ो सिंधूअ जे मंच ते पंहिंजी कविता पेश करण आयो ऐं कविता में पंहिंजी पुख़्तगीअ जो अहिसासु करायाईं। रायपुर जे कैलाश शादाब पंहिंजन ग़ज़लन सां प्रोग्राम जी रंगत में नवाणि आंदी। ‘कौन बनेगा करोड़पति’ फेम द्रोपदी चंदनाणी सिंधी कविता जे मैदान में नईं आमद आहे। हिन कवियत्री में घणियूं उम्मेदूं रखी सघिजन थियूं। अलीगढ़ मां आयल अर्जुन चावला बि पंहिंजे ग़ज़ल सां मुतासि़र कयो। होशंगबाद जो नौजवान शायर जेको कवि सम्मेलन जो संचालन तमामु दिलकश नमूने करे रहियो हो उनजूं रचनाऊं बु॒धी लगो॒ त नईं पीढ़ी बि सिंधी बो॒लीअ खे ज़िंदह रखण में सरगर्म आहे। विम्मी सदारंगाणीअ जी कविता ‘कहाणी’ बु॒धंदड़न खे ख़ूब पसंद आई।

            हिन मोक़े ते डॉ. विनोद आसूदाणी जे गज़लन जे मजमूए ‘‘भुणि-भुणि’’ ऐं भग॒वान बा॒बा॒णीअ जे नाटक ‘‘किराये जा कांधी’’ किताबन जी रूनुमाई बि विम्मी सदारंगाणी, अशोक जमनाणी, कैलाश शादाब ऐं अर्जुन चावला जे हथन सां कई वई।

-भगवान बाबाणी/23.07.2012