भारतीय प्रशासनिक सेवा में सिंधी बोली

लेखकु-डॉ. रविप्रकाश टेकचंदाणी
ravitekchandani@rediffmail.com
प्रस्तुति - भगवान बाबाणी
bhagwanbabani@gmail.com

[ बीं किस्त ]

हिति इहा गाल्हि बि ध्यान ‍डियण लाइकु आहे त राजस्थान लोक सेवा आयोग बि पंहिंजी परीक्षाउन में सिंधी विषय खे तसलीम कयो आहे। जंहिंजो फ़ाइदो किनि सिंधी शार्गिदन खे मिलियो आहे, उहे सिंधी विषय सां परीक्षा पास करे प्रशासनिक उहिदनि ते मुकर्र थिया आहिन।

हिति इन गाल्हि जो ज़िक्रु करणु ठीक थींदो त संविधान जे अठें शेडयूल जे अलावा अनुच्छेद 347, 350, 350(क) ऐं 350(ख) जी मदद सां बि सिंधी समाज खे अनेक लाभ मिली सघनि था, मसलन- कमीशन फॉर सिंधी अफेयर जी स्थापना कराये सघिजे थी।
वझः-
भारतीय प्रशासरिक सेवा यानी आई.सी.एस. भारत जे आला दर्जे जी महत्वपूर्ण ऐं मानाइती सरकारी सेवा आहे। हिन सेवा खे भारत जे सरकारी तंत्र जे कंधे जी हडी चयो वियो आहे।
अजोकी तारीख़ में भारत में राजनैतिक, आर्थिक सामाजिक, सांस्कृतिक ऐं विदेश नीति जहिड़ियुन व्यवस्थाउन जी धुरी प्रशासनिक सेवा ई आहे। इनकरे सरकारी शब्दावलीअ में हिन सेवा खे ‘स्टील फ्रेम’ जी संज्ञा ‍डिनी वेई आहे। स्टील फ्रेम यानी जटाऊ, टिकाऊ, चमकदार, सुहिणों ऐं लम्बे वक्त़ ताईं हलण वारो, यानी हीउ प्रशासनिक ढांचो अडोल आहे। जडहिं त मंत्री पदु जटाऊ नाहे, वधि में वधि पंजनि सालन लाइ हूंदो आहे, नंढे अर्से ताई रहंदो आहे।
मशहूर चविणी आहे त भारत देश जे सरकारी कारोबार खे टे ताक़तवर शख्स़ ई हलाईंदा आहिन-पी.एम., सी.एम. ऐं डी.एम. यानी प्रधानमंत्री, मुख्यमंत्री ऐं डिस्ट्रिक्ट मैजिस्ट्रेट। इन्हीअ चविणीअ मां ई अंदाज़ो लगाए सघिजे थो
त डी.एम. यानी कलेक्टर केतिरो ताकतवर ऐं रसूख वारो शख्स़ु थींदो आहे।
दैनिक जागरण नाले अख़बार में छपियल हिक ख़बर मूजिब विचोले दर्जे जी 75 कंपनियुन में सीईओ वटि जेका गडियल ताक़त हूंदी आहे ओतिरी हिक ज़िले जे कलेक्टर वटि हूंदी आहे। अचो उत्तरप्रदेश जे फैज़ाबाद ज़िले में मजिस्ट्रेट
जो उहिदो माणींदड़ आईण.ए.एस. आफीसर शुभ्रा सक्सेना जो मिसालु ‍डिसूं- हीअ भेण आई.आई.टी. मां इंजीनियरिंग जी डिग्री हासिल करण बैदि अमेरिका जी हिक वडी कम्पनी में आफीसर बणी, पर तसल्ली कोन थियसि, मन खे मज़ो न आयुसि।
अमेरिका मां वापस भारत में अची आई.ए.एस. इम्तिहान जी त्यारी कयाईं ऐं सन् 2008 में टॉप कयाईं ऐं हाणे भारतीय प्रशासनिक सेवा मार्फ़त पंहिंजी मन मुराद पूरी करे रही आहे। भेण शुभ्रा जो चवणु आहे,‘अहिड़े ऊचे उहिदे वारी भारत सरकार जी नौकरी करण में जेको आनंदु मिली रहियो आहे उहो अमेरिका जी ख़ानगी कम्पनीअ में नौकरी करण में कोन हासिल पियो थिए। हूअ अगिते चवे थी त भारतीय प्रशासनिक सेवा में आईंदो महफूज़ आहे, मानु मर्तुबो, रुतिबो आहे। पावर आहे। समाज जे विचमें रही कमु करण जो, शेवा करण जो बेमिसाल मौक़ो आहे।
सुठी पघार सां गडु तमामु घणियूं ‍बियूं सुविधाऊं पिण मिलंदियूं आहिन।’
अहिड़ो ई ‍बियो मिसालु आहे असांजे पंहिंजे सिंधी भाउ- डॉ.मनोहर अगनाणीअ जो। हू एम.बी.बी.एस. डॉक्टर आहे पर जडहिं डॉक्टर बणिजण बैदि नौकरी कंदे समाज शेवा करण जो सुपिनो मन मुताबिक पूरो न करे पिए सघियो त आई.ए.एस. बणिजण जो संकल्प वर्ताईं। संकल्प सां गडु ईमानदारी ज़रूरी आहे। महिनत कयाईं ऐं आई.ए.एस. आफीसर बणियो। हिति इहा गाल्हि बुधाइणु तमामु ज़रूरी आहे त डॉ. अगनाणी सिंधी भाषा ऐं साहित्य विषय जी मदद सां आई.ए.एस. आफीसर बणियो आहे। डॉ. अगनाणी जी मादरी ज़बान सिंधी बोलीअ खेस जीवन में हिकु
सुहिणो ऐं ऊंचो मुकाम बख्श़ियो आहे।
जेके सिंधी भाउर भेनरूं पंहिंजी मादरी ज़बान सिंधीअ खे घटि लेखींदा आहिन, सिंधीअ में रोज़गार कोन आहिन, अहिड़ो सुवालु उथारींदा आहिन, उन्हनि वास्ते ही अनोखो मिसालु आहे। हिक अहिड़ी दिशा आहे जंहिंते पूरी लगन, ईमानदारी ऐं सच्चाईअ सां अगिते विख वधाइण जी ज़रूरत आहे।
विश्व जी झूनी सक़ाफ़त, सिंधु माथरीअ जी सभ्यता जा वारिस ‘सिन्धी’ भारत में अक्सर पुछंदा आहिन त असां पंहिंजी मादरी ज़बान सिंधी छो पढूं? छो लिखूं? छो गाल्हायूं? इहा पढ़ण मां असांखे कहिड़ा फ़ाइदा आहिन? मां समझां
थो समूरी कायनात में हिकिड़ी असांजी ई अभागी क़ौम आहे जेका अहिड़ा सुवाल पैदा कंदी आहे। ‍बियो को बि समाज पंहिंजी मादरी ज़बान खे पढ़ण, लिखण, अपनाइण लाइ अहिड़ा सुवाल कोन पुछंदो आहे।
तव्हां बुधायो छा असीं पंहिंजी माउ जी कुखि मां जनम वठण बैदि उनखां पुछंदा आहियूं त, अमड़ बुधाइ, तुंहिंजी कुखि मां जनम वठण जा कहिड़ा-कहिड़ा फ़ाइदा आहिन? जेकडहिं न, त अचो सियाणा ऐं समझू बणिजूं ऐं अहिड़न सुवालनि खे पुछण बदिरां पंहिंजे बारन खे सिंधी बोली ऐं अदब जी मदद सां आई.ए.एस., आई.पी.एस, आई.एफ.एस बणाइण लाइ माहौलु त्यारु कयूं। पंहिंजन नींगरन खे ग्रेजुएशन कंदे ई धंधे वापार या दुकानदारी में न मोकिलियूं। थोरो
इंतिज़ारु कयूं। धीरजु रखूं छो त इंतज़ार जो मेवो मिठो थींदो आहे।
असां सभिनी सिंधियुन खे ख़बर आहे त देश जे विरहाङे सबब असीं दाणो-दाणो थी विया आहियूं। हिक हंधि यकमुश्त थी कोन पिया रहूं । घण-भाषाई भारत में
असां सिंधियुन जी आदमशुमारी ‘उठ जे मुंहं में जीरे’ मिस़ल आहे।
क्षेत्रवाद, भाई भतीजावाद, जातीवाद जे रंग में रङियल राजनीतिक खेत्र में
वडे वक्त़ ताईं सलामत रहणु औखे कमु आहे। आज़ादीअ जे 63 सालन बैदि बि भारत
में न पंहिंजो प्रधानमंत्री बणाए सघिया आहियूं ऐं न वरी कंहिं सूबे जो मुख्यमंत्री। हा, जेकडहिं हर साल ब डी.एम. पैदा कयूं हा त अजु मुल्क़
में हिकु सैकड़ो खां मथे सिंधी आईएएस आफ़ीसर मुख्त़लिफ़ ज़िलन जा कलेक्टर हुजन हा ऐं असां जे समाज जे आडो क़दम-क़दम ते ईंदड़ हर क़िस्म जी मुश्क़िलातुन जो हलु सविलाईअ सां निकिरंदो नज़र अचे हा। सचु, अञा बि अवेर कोन थी आहे।
अचो त जल्दु जागूं ऐं खोले खंभ उडामूं। सिंधी भाषा पढूं, पढ़ायूं, बारन खे आई.ए.एस. बणायूं। पंहिंजे समाज जो भलो कयूं। हिकु क़दमु अव्हां वधाईदा त नवानवे क़दम सिंधी बोली वधाईदी। ‍बियन विषयन जी भेट में सिंधी भाषा ऐं
साहित्य पढ़ण सां आई.ए.एस. इम्तिहान में सफल थियणु सवलो आहे। पंहिंजी मादिरी ज़बान में छपियलु अदबु सवलाईअ सां पढ़ी, समझी ऐं लिखी सघिजे थो ।
सिविल सेवा परीक्षा में सिंधीअ जो पाठ्यक्रम ‍बियन विषयन जी भेट में नंढो आहे। सिंधी भाषा लाइ क़तबु ईदड़ ‍बिन्ही लिप्युन यानी अरबी ऐं देवनागरी लिपीअ में जवाब लिखी सघिबा आहिन। न रुगो एतिरो पर सभिनी खां अहम गाल्हि जेका हित वाज़ह करणु चाहियां थो, रेखांकित करणु चाहियां थो सा इहा आहे त
सिविल सेवा जी मुख्य परीक्षा में कंहिं बि विषय जो पर्चो सिंधी माध्यम सां लिखी सघूं था। मतिलबु त इतिहासु, भूगोल, फ़िलासाफ़ी, राॼनीति विज्ञान जहिड़ा अनेक विषय सिंधीअ में पंहिंजी मातृभषा में लिखी सघूं था । सिंधीअ
में लिख्यल उत्तर पुस्तिका केरु चेक कंदो ? केरु जाचींदो ? केरु मार्कूं डींदो? इन्हीअ जो जवाबु अव्हां सभिनी वटि आहे।
त अचो मनु पको करे संकल्पु वठूं त जीअं हर हिक सिंधी घर मां घटि में घटि हिकु जवानु सिंधी विषय खणी आईएएस जी त्यारी शुरू करे। मिट-माइट पको पहु कनि। शागिर्दन खे घुर्बल सहूल्यतूं मुहैया कराइनि, पंहिंजन बचिड़नि जी
हिमथ अफ़ज़ाई कनि ऐं जीअं गुरू गोविंदसिंह पंहिंजे समाज खे जागाईंदे चयो हो त, "सवा लाख से एक लड़ऊं तो मैं गुरू गोबिंदसिंह कहाऊं", उन्हीअ तर्ज़ ते सिंधी समाज जे हर हिक माउ-पीउ खे, हर पंचायत जे मुखीअ खे अगिते अची चविणो
पवंदो, नारो बुलंद करिणो पवंदो, " सिंधी बोली पढ़ूं पढ़ायूं, हर घर मां हिकु आई.ए.एस. बणायूं"।