भारतीय प्रशासनिक सेवा में सिंधी बोली

भारतीय प्रशासनिक सेवा में सिंधी बोली

लेखकु-डॉ. रविप्रकाश टेकचंदाणी
ravitekchandani@rediffmail.com
प्रस्तुति - भगवान बाबाणी
bhagwanbabani@gmail.com

[ आख़िरी किस्त ]

सिविल सेवा परीक्षा जो सरूप- हिक नज़र में
भारतीय प्रशासनिक सेवा परीक्षा भारत में सभिनी खां श्रेष्ठ नौजवानन खे चूंडण लाइ हिक साल में हिकु दफ़ो ई आयोजित कई वेंदी आहे। हिन परीक्षा में शामिल थियण लाइ उम्मीदवार खे भारत जो नागरिकु हुअणु, 21सालन खां 30 सालन
जे विच वारी उमिर जो हुअणु ऐं ग्रेजुएट हुजणु ज़रूरी थींदो आहे। संघ लोक सेवा आयोग यू.पी.एस.सी. पारां हिन इम्तिहान खे हेठियन टिनि मंज़िलुन में विरहायो वियो आहे :-
पहिरीं मंज़िल आहे-
प्रारम्भिक परीक्षा- जेका मई महिने में थींदी आहे ऐं इन जो नतीजो जुलाई या आगस्ट में निकरंदो आहे। प्रीलीमिनरी टेस्ट हिक तरह सां स्क्रीनिंग
टेस्ट आहे। हिन इम्तिहान जी मदद सां लायक़ीअ में कमज़ोर ऐं मिटनि माइटन सां गडु पंहिंजो पाण खे धोखो डियण जी कोशिश कंदड़ शार्गिदन खे अगिते वधण खां रोकियो वेंदो आहे त जीअं मुख्य परीक्षा में रुगो सुघड़, सुजाग, ऐं सुपकु शार्गिद ई शामिल थी सघनि। हिन इम्तिहान में कुल 2 पर्चा थींदा आहिन। पहिर्यों सामान्य अध्ययन यानी जर्नल स्टडी जो, जेको सभिनी लाइ लाज़िमी थींदो आहे। ही पर्चो 150 मार्कुन जो थींदो आहे। ‍बियो पर्चो आप्शनल थींदो आहे। जेको ‍डिनल फहिरस्त मां शार्गिद खे पंहिंजी पसंद सां चूंडिणो पवंदो आहे। ही पर्चो 300 मार्कुन जो थींदो आहे। हित अव्हां सभिनी जो ध्यानु छिकाइणु चाहियां थो त यूपीएससी ईंदड़ साल सन् 2011 खां
प्रारम्भिक परीक्षा जे सिटाअ में कुझु बदिलाउ आणण जो मंसूबो कयो आहे।
बी मंज़िल आहे -
मुख्य परीक्षा (Main Examination) जेका आक्टोबर या नवम्बर महीने में थींदी आहे ऐं इनजो नतीजो मार्च में निकरंदो आहे। मुख्य परीक्षा खे पास करण ज़रूरी आहे। मुख्य परीक्षा जे पर्चन में जवाब मज़मून में यानी विस्तार
सां लिख्या वेंदा आहिन। हिन इम्तिहान में कुल 9 पर्चा थींदा आहिन। हर हिक पर्चे खे लिखण लाइ टे-टे कलाक मिलंदा आहिन। पहिर्यों पर्चो भारतीय
संविधान जे अठें शेड्यूल में शामिल बोलियुन जो थींदो आहे। हिन पेपर में सिंधी शार्गिद सिंधी बोली खणी सघनि था। हिन पर्चे में पुछियल सुवालनि जो मयारु डहें दर्जे जे मयार जहिड़ो थींदो आहे। ‍बियों पेपर अंग्रेज़ी भाषा ज्ञान जी जाचना लाइ वर्तो वेंदो आहे। ही बई पर्चा टिन-टिन सौ मार्कुन जा थींदा आहिन। हिनन पर्चनि में हासुल मार्कूं मुख्य परीक्षा जे कुल मार्कुन में जोड़ियूं वेंदियूं आहिन छो त ही बई पर्चा रुगो Qualifying आहिन। पर हिनन ‍बिन्ही पर्‌चनि में पास मार्कूं हासुल करण बैदि ई शागिर्द जा मुख्य
परीक्षा जा ‍बिया पेपर चकासिया वेंदा आहिन।
हिनन बिन्ही जे अलावा शार्गिद खे 200 मार्कुन जो मज़मूनन जो हिकु पर्चो ऐं 300-300 मार्कुन जा जनरल स्टडी जा ब पेपर लिखणा पवंदा आहिन।
हिनन पंजन पर्चन जे अलावा शार्गिद खे ब विषय पंहिंजी मर्जीअ जा चुंडिणा पवंदा आहिन। हिनन बिन्ही विषयुन जा 2-2 पेपर थींदा आहिन ऐं हर हिकु पेपर 300 मार्कुन जो थींदो आहे।
हित हिक ख़ास गाल्हि खे वाजह करणु चाहियां थो त वैकल्पिक विषय जे रूप में शार्गिद सिंधी विषय खणी सघन था ऐं पंहिंजी सहूलियत मूजिब अरबी या देवनागरी लिपीअ में जवाबु लिखी सघन था। सिंधीअ जे पहिर्यें पर्चे में सिंधी भाषा जे बुण-बुनियाद यानी उद्भव ऐं विकास, सिंधीअ जूं उपभाषाऊ, सिंधी शब्दावली, सिंधी बोली लाइ क़तबु ईदड़ लिपियूं, विरहाङे बैदि भारत में
सिंधी भाषा जी हालत ‍बियन बोलियुन जो सिंधीअ ते असरु, सिंधी साहित्य जा मुख्त़िलिफ दौर, प्रवृतियूं वग़ैरह ते सुवाल पुछिया वेंदा आहिन।
सिंधीअ जे ‍बिएं पर्चे में पाठ्यक्‌रम मूजिब कविता, कहाणी, नावेल, नाटक, मज़मून जीवनी, आत्मकथा जे चूंड किताबनि ते सुवाल पुछिया वेंदा आहिन।
किताबनि जी फहिरस्त में के हिन रीत आहिन- शाह जो चूंडु शइरु, सचल जो चूंडु कलामु, सामीअ जा चूंडु सलोक, काको कलूमल, सत डींहं, बंधन, मुंहिंजी हयातीअ जा सोना रोपा वर्क, डॉ. चोइथराम गिदवाणी वग़ैरह।

टीं मंज़िल आहे -
साक्षात्कार यानी इंटरव्यू- मुख्य परीक्षा में हासुल कयल मार्कुन जे निस्बति सफल शार्गिदन खे संघ
लोक सेवा आयोग जे नई दिल्ली मुख्यालय धौलपुर हाऊस में इंटरव्यू लाइ घुरायो वेंदो आहे। साक्षात्कार बि 300 मार्कुन लाइ जुदा-जुदा बोर्ड्न
पारां वर्तो वेंदो आहे। इंटरव्यू जो मक़सदु शार्गिदनि जी सुपूर्ण् शख्सियत खे चकासण जो थींदो आहे। बोर्ड् जा मेम्बर कथ कंदा आहिन त उम्मीदवार में समाजी मसइलन, देश-विदेश जे मसइलनि खे भारती नज़रिए सां समझण जी ऐं ओख-डोख करण जी क़ुवत आहे या न। ऐं हुननि में समाज जी अगवानी करण जी सघ आहे या न।
मुख्य परीक्षा ऐं इंटरव्यू में हासुल मार्कुन जे आधार ते ख़ाली पदनि खे ध्यान में रखी आख़िरी नतीजो ज़ाहिर कयो वेंदो आहे ऐं काम्याब शार्गिदन खे पद ऐं विभाग विरहाया वेंदा आहिन। जिन मां कुझु हिन रीति आहिन :-
1. इंडियन एडमिन्स्ट्रेट सर्विस
2. इंडियन फॉरेन सर्विस
3. इंडियन पोलिस सर्विस
4. इंडियन रेवेन्यू सर्विस
5. इंडियन रेल्वे सर्विस
6. इंडियन डिफेंस सर्विस
भारतीय प्रशासनिक सेवा आई.ए.एस. में चूंडिजण बैदि ऑफीसरन खे मसूरी जे लाल बहादूर शास्त्री प्रशासनिक ‍प्रशिक्षण केन्द्र में ट्रेनिंग ‍डिनी
वेंदी आहे। ट्रेनिंग हासिल करण खां पोइ आफीसरन जी मुकर्री कंहिं ज़िले जे डी.एम. उहिदे ते या मर्कज़ी या सूबाई सरकार में सेक्रेटरी जे उहिदे ते थींदी आहे। इनजे अलावा सरकारी इदारनि, नीम सरकारी इदारनि या ख़ुद-मुख्त़ियार इदारनि में आई.ए.एस. आफीसरन खे अध्‌यक्ष या चेयरमेन पिणमुकर्र् कयो वेंदो आहे। इहे ई आई.ए.एस. आफीसर आहिस्ते- आहिस्ते केबिनेट
सेक्रेटरी जे आहिदे ताई बि पहुचंदा आहिन।
भारतीय पुलिस सेवा यानी आई.पी.एस. में चूंडियल आफीसरनि खे मुख्त़लिफ ज़िलनि में एसपी, एसएसपी, डीआईजी, आईजी जहिड़नि आहिदनि सां नवाज़ियो वेंदो आहे। भारतीय विदेश सेवा यानी आई.एफ.एस. में चूंडिजण बैदि दुनिया जे मुख्त़लिफ मुलिकन में कायम भारत जे दूतावासन यानी हाई कमीशन में आफीसर
बणायो वेंदो आहे। इहे आफीसर धीरे-धीरे विदेश सचिव जे ऊचे पद ताई बि पहुची वेंदा आहिन।

4. दशा-दिशा:-
अहिड़े ऊच प्रभावशाली ऐं रसूख़ वारनि पदनि ते असांजा नौजवान कीअं पहुचनि इन्हीअ डिस में सिंधी समाज कडहिं बि गंभीरता सां सोच्यो ई न आहे, जडहिं त‍ बियन समाजन पारां हिन डिस में वर्तल कोशिशूं असां खां लिकल कोन आहिन।
उन्हन खां असांखे दिशा ऐं प्रेरणा वठणु घुरिजे :-
मूंखे याद आहे सन् 1992 में दिल्ली यूनीवर्सिटी में मंडल कमीशन जे पक्ष ऐं विपक्ष में हलंदड़ आंदोलन दौरान बहुजन समाज पार्टी जे स्वर्गीय नेता कांशीराम मंडल कमीशन रिपोर्ट खे ध्यान में रखी एस.सी., एस.टी. ऐं ओ.बी.सी. शार्गिदन में जोश भरींदे चयो हो त "नौजवान साथियो, मूंखे
अव्हां पंहिंजे घरनि मां हिकु आई.ए.एस. आफीसर ‍डियो मां समूरे भारत जी सियासी, समाजी रंगत मटे छडींदुस। अव्हांजो रुतिबो एतिरो वधाए छडींदुस जो अव्हां सभेई पंहिंजो गाटु रौब सां मथे करे घुमंदा।" सचु, इन्हीअ डस में जेकडहिं प्रतियोगिता दर्पण नाले मैग़ज़िन जे जुलाई 2010 जे पर्चे में छपियल अंग अखरनि ते नज़र विझूं त ख़बर पवे थी त रुगो सन् 2007 में सिविल
सेवा में सफल कुल 638 ऑफिसरन में 352 आफीसर हिक समाज जा आहिन। हूंदा बि छो
न? हिन समाज जो सजणन वटि दृष्टि आहे यकमुश्ति आहे। पंहिंजे सुहिणे आईदे लाइ चिटी तरह सां समझियल माण ऐं मापा आहिन। सरकारी ऐं ख़ानगी सतह ते अनेक योजनाऊं आहिन- योजनाउन खे अमली जामो पहिराए शार्गिदन जी मदद करण वारो जज्‍बो आहे- इन्हीअ जज्‍बे जे असर हेठि अची मुफ्त किताब, मुफ्त कोचिंग ऐं हास्टल जी सुविधा डई जवानन में जोशु भरींदा आहिना.
‍बियो मिस़ालु आहे जैन समाज जो- ही जे.आई.टी.ओ. यानी जैन इंटरनेशनल
ट्रेडर्स आर्गेनाईजे़शन नाले संस्था मार्फत जैनी नवजानन खे आई.ए.एस. जी त्यारी करण लाइ हॉस्टल, किताब, माली मदद ऐं माहौल मुहैया कराईंदा आहिन।
सुठी सोच ऐं सुठे कम जो नतीजो त सुठो ई निकरंदो आहे।
टियों मिसालु आहे - संकल्प नाले ख़ानगी संस्था जो, जेके 'नो प्राफिट, नो लॉस' आधार ते राष्ट्रवादी सोचु रखंदड़ परिवार जे बारन लाइ कोचिंग, किताब, हॉस्टल, गाईड्स यानी हर क़िस्म जी घुर्बल सुविधा डींदा आहिन ऐं अव्हां खे जाणी अचिरजु थींदो त यू.पी.एस.सी. जे फाइनल रिज़ल्ट मां हर साल हिन संस्था जा सौ खां वधीक शार्गिद हूंदा आहिना
चोथों मिस़ालु आहे- सरदार पटेल इंस्टीट्यूट ऑफ पब्लिक एडमिनिस्ट्रेशन, अहमदाबाद जो। ही गुजरात सरकार जो प्रोजेक्ट आहे। हिति गुजराती भाषा जे माध्यम सां नौजवाननि खे आई.ए.एस. जी त्यारी कराई वेंदी आहे। शहर खां कुंड पासीरो, शांत वातावरण में ठहियल हिन संस्थान में घुमंदे खबर पेई त हितां हर साल ट्रेनिंग ऐं मदद वठी 20-25 गुजराती बार भारतीय प्रशासनिक
सेवा जी परीक्षा में सफल थींदा आहिन।
इनजे अलावा मर्कज़ी ऐं सूबाई सतह ते संस्कृत, उर्दू ऐं हिन्दीअ जूं सरकारी ऐं ग़ैर सरकारी संस्थाऊं पंहिंजी बोलीअ जे विकास ऐं वाधारे लाइ
पंहिंजी भाषा जे नौजवाननि खे आई.ए.एस. बणिजण लाइ फ्री कोचिंग डींदियूं आहिन। साल 2009 में कश्मीर जे रहाकू डॉक्टर शाह फैसल उर्दू बोली ऐं अदब जी मदद सां ई आई.ए.एस. परीक्षा में टॉप कयो आहे।
अहिड़े सुहिणे मिस़ाल मां प्रेरित थी मां पंहिंजे सिंधी नौजवान दोस्तनि खे जागाईंदे चवणु चाहियां थो त अव्हां पिण पंहिंजी मादिरी ज़बान,
मातृभाषा सिंधीअ जी मदद सां आई.ए.एस. बणिजी सघो था, टॉप करे सघो था। बस, ज़रूरत आहे ईमानदारी सां, लगन सां, अविर्चाईअ सां , धीरज सां पंहिंज लक्ष्य खे हासिल करण लाइ चाणक्य वांगुरु चोटी बधिजे।
साथियो, गाल्हि इते ई पूरी नथी थिए। सिंधी शार्दिन मां उम्मेद रखणु त चङो कमु आहे पर उहो को ‍बियो फहमु आहे जंहिं सां पिरींअ खे पसे सघिजे थो-
जेकडहिं उन बाबत हिति गाल्हि न चोरिबी त हिकतर्फो इश्कु़ थी पवंदो ऐं अव्हां सभेई जाणू ऐं अक़ाबर आहियो त हिक तर्फा इश्कु़ कडहिं बि मुकाम ते न पहुचाईंदो आहे। इन्हींअ करे राष्ट्रीय सिंधी भाषा विकास परिषद, सूबन जूं सिंधी अकादमियुन सां गडु ख़ानगी संस्थाउन ऐं पंचायतुन खे सिंधी शार्गिदन जे फ़ाइदे में हेठियां क़दम खणिणा पवंदा, उपाव वठिणा पवंदा, पंहिंजो कर्तव्य निभाइणो पवंदो, तडहिं सिंधी जवानन खे आई.ए.एस. बणाइण जो सुपनो साकार थींदो :-
1. सभिनी खां अवल भारत जे हर शहर में आई.ए.एस. जी त्यारी कंदड़ सिंधी शार्गिदन जी फहरिस्त ठाहिजे। इन फहिरिस्त में शागिर्दन पारां चूंडियल विषय ऐं माध्यम जो ज़िक्रु कजे।
2. डहों पास करण बैदि सिंधी शागिर्दन खे आई.ए.एस. इम्तिहान बाबत बुधाइजे,आई.ए.एस.
परीक्षा में सिंधी विषय खणण मां फ़ाइदा बुधाइजन।
3. शागिर्दन जो उत्साहु वधाइण लाइ शहर जे डी.एम्, एस.पी. वग़ैरह सां मुलाक़ात कराइजे ऐं कंहिं बि आई.ए.एस. आफ़ीसर खे पंहिंजी संस्था में घुराए उनजे जीवन जा अनुभव बुधाइजन।
4. आई.ए.एस.जी त्यारी कंदड़ बारन लाइ शहर-शहर में लाइब्रेरी ऐं रीडिंग रूम जो बंदोबस्तु कजे।
5. भारतीय प्रशासनिक सेवा में सिंधी विषय जे पाठ्यक्रम जा किताब ‍बिन्ही लिप्युन में हथि करे शागिर्दन खे प्रिंट ऐं डिज़ीटल फार्मेट में मुफ़्त
‍डिजनि
6. यूपीएससी खां पोयन 10 सालन जा सिंधी विषय जा पर्चा हथि करे उन जे आधार ते विद्वाननि खां लेख लिखराए छपाइजनि ऐं विर्हाइजन।
7. राष्ट्रीय सिंधी भाषा विकास परिषद खे उर्दू ऐं संस्कृत परिषद वांगुरु आई.ए.एस. जी त्यारी कंदड़ सिंधी शागिर्दन लाइ दिल्ली में हर साल हिक महीने जी मुफ़्त कोचिंग जो बंदोबस्तु करण खपे।
8. राष्ट्रीय सिंधी विकास परिषद खे शागिर्दन लाइ मुख्‍तलिफ़ शहरन में हिक डींहं जो वर्कशॉप करणु खपे जंहिं में आई.ए.एस. परीक्षा में विषय जी चूंड, वक्‍त जी अहिम्यत, पाण खे सुञाणण, इम्तिहान जी त्यारीअ लाइ अजोका ऐं नवां त़रीक़ा ऐं किन ‍बियन मोजू़अन ते लेक्चर कराइणु खपनि ऐं इहे लेक्चर आडियो सी.डी. में आणे विर्हाइणु खपनि।
9. परिषद खे सिंधी शागिर्दन में सिंधी भाषा ऐं साहित्य डांहुं लाड़ो पैदा करण लाइ साल में ब दफ़ा "सिंधी ज्ञान प्रतियोगिता जो आयोजनु करणु खपे ऐं इनमें सफ़ल शागिर्दन खे इनाम ऐं इक्राम ‍डियणु खपनि।
10. आई.ए.एस. इम्तिहान में सिंधीअ खे माध्यम जे रूप में अपनाइण लाइ शागिर्दन जी खास हिमथ अफ़ज़ाई कजे ऐं उन्हन जी सहूल्यित लाइ किन चूंड विषयन जो मवादु सिंधीअ में मुयसिरु कराइजे। मसलन शुरू शुरू में इतिहास,
फ़िलासाफ़ी, पब्लिक एडमिनिस्ट्रेशन, पोलिटीकल साइंस वग़ैरह।
11. सिंधी समाज जे डॉक्टरन, इंजीनियरन, वकीलन, एम.बी.ए. कयल जवानन खे सिंधी विषय खणी आई.ए.एस. जी त्यारीअ लाइ हिमथाइजे।
12. राजस्थान पब्लिक सर्विस कमीशन वांगुरु ‍बियन सूबन जी प्रशासनिक सेवा जी परीक्षाउन में बि सिंधी विषय खे शामिल कराइण वास्ते कोशिशूं वठिजन।
13. परिषद पारां रिटायर्ड ऐं वर्किंग प्रशासनिक अधिकारियुनि जो साल में हिकु मेड़ु कोठाइजे, उन्हनि वटां मार्ग दर्शन प्राप्त कजे ऐं उन्हनि जी
हिक डायरेक्टरी बणाइजे।
14. आई.ए.एस. इम्तिहान लाइ सिंधी विषय पाढ़ींदड़ प्रोफेसरन जो बि साल में हिकु मेड़ु कोठाइजे त जीअं हू पाण में वीचारनि जी डे वठु करे सघनि ऐं शागिर्दन जी हिमथ अफ़ज़ाई करे सघनि।
आख़िर में, अव्हां सभिनी साम्हूं पंहिंजो सुपनो, पंहिंजी मन-मुराद, पंहिंजे हींएं जो हालु ओरींदे अर्ज़ु करणु चाहियां थो त जेकडहिं अव्हांजे
दिल में सिंधी समाज जे वाधारे लाइ सचुपचु कुझु करण जी तमन्ना ऐं जज्‍बो जीअरो आहे त भारत जे सिंधी शागिर्दन लाइ दिल्लीअ में हिकु हॉस्टल बणाइण लाइ अगियां अचो। जेको नो प्राफिट नो लॉस आधार ते कमु करे ऐं प्रापर्टी कंहिंजी थींदी? त जंहिंजी खुडु, मिठाई बि उनजी थींदी यार।