गुमान

कविता

गुमान

हिक डींहं,

हिक वडे वण ते,

उनजी पाड़ ते ,

हिक नंढी बूटी निकती,

वण पंहिंजी बची समझी ,

उन खे सहारो डिनो ,

उस में,

थधि में ,

मींहं में ,

आंधी तूफ़ान में ,

हूअ उनजे तन सां लिपटण लगी ,

वधंदी वई,

एतरो वधी वई ,

जो सजे वण ,

जो कदु पाए वई ,

हाणे गुमान थियुस‍ि ,

त मां केतरो वेठी वधां?

ऐं बुढो वण ,

ओतरो ई ओतरो ?

उन रात ई एतरो तूफ़ान आयो !

जो आसे पासे जा सभु बूटा ,

नासु थी व्या,

रुगो हू वणु बच्यो ,

लता मरंदे मरंदे चयो !

अबा मूंखे माफ़ कजां

जंहिं सहारो डिनो,

काश उन ते न खिलां हां?

-- डा. ध्रुव गुरबानी तनवानी , रांची
<tanvanid@yahoo.co.in>

ग़ज़ल

ग़ज़ल

चंड खे ककिरीअ छुहियो हो,

चांदिनी जो मुंहुं फिरियो हो.

मुख हंया नारा, खजिया हथ,

मनु जुलूसनि में दुखियो हो.

डाढ सदिमनि जी तपति में,

लुड़िकु अखि में किथि बचियो हो.

ख़ाकि थ्या सुपना सभेई ,

कंहिं नज़र कारीअ डंगियो हो

फ़र्श खे थे दर बुधायो,

शहर डाढो तिरितिरियो हो.

ज़िंदगीअ खे वक्तु पकिड़े,

जणु मदारीअ ज्यां हल्यो हो.

रोज़ु थी खाली वञे थो,

पेट जो मटु मूं भरियो हो.

प्यास हुई मजबूर केडी,

समुंडु जो खारो बणियो हो.

चीख़ गूंजाया कईं शक,

राति बसि गडु डपु रहियो हो.

ज़िंदगी मुरिकण लगी हुई,

सुब्हु जीअं घर में घिड़ियो हो.

हर नसीहत ते खिल्यों थे,

तूं चवीं थो हू चरियो हो.

--खीमन यू मूलाणी

A- NEW14/134,

BAIRAGARH, BHOPAL-462030

MOBILE- 09827343735

ग़ज़ल

खीमन यू मूलाणी

पल पल सूर पुराणा आहिनि,

टिमि टिमि टिमि टांडाणा आहिनि.

आस उमेद अञा रोशन आ,

छा थ्यो टहिक उझाणा आहिनि.

रस्तनि पेरनि साणु निभायो ,

चौंकनि वटि पर माणा आहिनि.

मुंहिंजा गीत ग़ज़ल ऐं वायूं,

खु़दि सां जणु ओराणा आहिनि.

रुगो॒ सुञाणनि था अंगनि खे,

जिनि वटि टूल विहाणा आहिनि

सभई शहर स्याणा आहिनि,

दर्दनि जा आडाणा आहिनि.

तेसीं रहंदी सिन्धियत जेसीं,

झूलणु ऐं बहिराणा आहिनि.

सिन्धी चमकनि था मोतियुनि जां,

तोड़े दाणा दाणा आहिनि.

हर माण्हूअ वटि हूंदा डाढा,

यादुनि जा सांधाणा आहिनि.

नेठि त मंज़िल ते रसंदासीं,

बोल न हीउ बा॒राणा आहिनि.

हाणोका जे पल ऊंदाहा,

रोशन संदमि सुभाणा आहिनि.

साफ़ दरी

साफ़ दरी

हिकु जवानु जोड़ो नईं जगह ते अची रहण लगो.

बे डींहुं सुबुह जो नौजवान पत्नीअ पंहिंजी पाड़े वारीअ खे कपड़ा सुकाईंदो डिसी घोट खे चयो, "हुन जा कपड़ा ख़ास अच्छा न था लगन. शायद हुन खे धुअणु नथा अचन या हुन खे सुठे साबूण जी ज़रूरत आहे."

घोट हुन डे निहारे वरी ब‍ि चुप रह्यो.

हूअ रोज़ उहा ई गाल्ह‍ि चवंदी हुई. हिक महीने खाँ पोइ हिक डींहुं हूअ हैरान थी जडहिं रस्सीअ ते साफ सुथरा कपड़ा लटक्यल डिठाईं.

चवण लगी, "आख़िर हूअ कपड़ा धुअण सिखी वई, न जाण कहिंखां सिखी आहे?"

घोटस मुस्कराए चयो, "अजु मां सुबूह जल्दी उथ्युस ऐं हीअ खिड़िकी सफ़ा करे छडी"

इहोई ज़िंदगीअ में थींदों आहे.

असीं पंहिंजे आस‍ पास जेको ब‍ि डिसंदा आह‍ियूं सो सभु असांजी डिसण वारी खिड़कीअ जी साफ़गोईअ ते मदार आहे.

(नेट तां)

सिन्धी अनुवाद - देवी नागरानी
dnangrani@gmail.com

तन्हा

तन्हा

-वासुदेव निर्मल
vasudev.nirmal@gmail.com

सिंधी बुढे जे मौत सां जलन था सिंधी किताब.

पोखियो अखिरोटन जो वणु पंहिंजन पोटनि लाइ.

शादी आहे लाटिरी, जंहिंखे लगे सो लालु.

क़र्ज़ु जो डींदें दोस्तन खे, यारी वेंदी टुटी.

ख़ामोशी आ ज़ाल जो सुठे में सुठो लिबासु.

शत्रु मुंहिंजे शत्रूअ जो, आहे मुंहिंजो मित्रु.

हाथी मुश्किल में हुजे ऐं डेडरु लतूं हणेसि.

कार्टून कार्नर

मुंहिंजी माउ

मुंहिंजी माउ

हिक भेरो कोई मूंखे मुंहिंजी माउ सां मिलाए!

जिते हूअ मुंहिंजो इन्तजार कंदी मिले

मूंखे डिसी तए में फ़ुलको विझण लाइ भजे

मां रड़ियूं कयां, फ़ुलको पचाए छोन थी रखीं?

मूंखे छिती बुख अचण सां ई लग़ंदी आहे

हूअ चवे तोखे कोसो फ़ुलको वणंदो आहे।

अहिड़ीअ देवी माउ सां कोई मूंखे मिलाए॥

सुबुह थियण सां गाडे वारे ख़ा जमूं वठे

वक्त कढी धोई साफ़ करे फ़िर‍िज में रखे

मंझद जो सुम्हण महल आणे चवे खा

मां नखरेली रुखो थी चवां मूंखे न वणंदा आहिन

हूअ चवे तोखे फ़ाइदो कंदा ब ट्रे खाई छडि।।

अहिड़ीअ देवी माउ सां कोई मूंखे मिलाए।

छंछर शाम वारन में सीरन में तेल विझे

आर्तवार डींहं चवे अचु मथो व‍िंह्जारांइ

मां नखरेली रुखो थी चवां वार मुंझंदा आहिन

हूअ चवे अचु मां थी वारन खे सुल्झायांइ।

अहिड़ीअ देवी माउ सां कोई मूंखे मिलाए।

मां पढ़ण में हुश्यार ए मेहनती हुअस‍ि

माउ पीउ जी लाडली बि घणी हुअस‍ि

बीअन सां मुंहिंजे पढ़ण लाइ विढ़ंदी

हूअ चवे मां हिन खे सुम्हंदो न थी डिसां

अहिड़ीअ देवी माउ सां कोई मुखे मिलाए।

--डा ध्रुव गुरबाणी तनवाणी

tanvanid@yahoo.co.