गडि॒यल कुटुम्ब जो अहिमियतु

गडि॒यल कुटुम्ब जो अहिमियतु
कुटुम्बु ई बा॒र खे सुधारण जो पहिर्यों डा॒को आहे। जहिड़ो कुटुम्बु हूंदो, तहिड़ा ई बा॒र थींदा। जहिड़ा कांग, तहिड़ा ब॒चा गडि॒यल परिवार में बा॒र, बु॒ढा, बीमार, अपंग ऐं कंहिं मुसीबत जे मारियल भातियुन जी पाण मुरादो सहायता थी वेंदी आहे।
गडि॒यल परिवारन में कुदरती रूप में प्यारु, दया, सहानुभूती, हमदर्दी, इंतज़ार, आदरभाउ, धरम, आज्ञा ऐं फर्ज़ु पालण ऐं ओड़े पाड़े जी शनास वगेरह ऐं जीवन में लाइकु थियण लाइ घुरबल गुण ऐं सुठा संस्कार मिलंदा आहिन। खानदानी धंधे, हुनर ऐं कला वगेरह जी पाण मुरादो ट्रेनिंग मिली वेंदी आहे। चवणी आहे त 'ब॒ त बा॒रहां' वांगुर हिक बि॒ए जी मदद मिलंदी आहे। शादी ग़मी, खर्च पखे ऐं बेरोज़गारीअ जो बारु हल्को थी वेंदो आहे। गडि॒यल परीवार जा भाती हिक बि॒ए जूं घुरजूं पूरियूं करे संसार रूपी सागर जी लहरुन ऐं लोड॒न खां पाणु बचाए हर किस्म जी चिन्ताउन खां दूर थी खुश रही सघन था। घर गिरहस्तीअ जो गाडो॒ बिनां धकन धोड॒न जे पाण मुरादो हिक बि॒ए जे सहारे सां हलंदो आहे।
गडि॒यल कुटुम्ब में घटि-वधि, रुसणु-परचणु ऐं थोरी घणी खिट पिट पई हलंदी आहे। पर वडि॒ड़ा सिख्या डे॒ई समुझाए खीर में खंडु वांगुर मिलाए छडीं॒दा आहिन। गडि॒यल कुटुम्ब में वड॒न जी मञिता थींदी आहे।
विदेशन जे अंधे फैशन ऐं नकल करे, असीं बि परीवारन जे टुटण करे या नंढे रूप हुअण करे मुसीबतुन, खराबियुन ऐं खतरे जे घेरे में प्या भिटिक्यूं। पंहिंजे परीवार वारन जे प्यार ऐं आदरभाउ जा सिकायल बुज़ुर्ग बु॒ढा आश्रम में शरन वठी प्या बाडा॒इन ऐं रोई प्या गो॒ढ़ा गा॒री‍नि ऐं गडि॒यल कुटुम्बन जा भाती घणो करे कंहिं बि थोरी घणी मुश्कलात या दुख वक्त हिक बि॒ए खे संभाले सघन था। घर जे वायूमुडल में इंतज़ाम में रहन था।
महिमानन जो आदरभाउ कीअं कजे, इहो सिखन था। डि॒ण वारन जो गडि॒यलु आनंद वठन था। हर कंहिं मोके ते खुश बि रहन था त वरी गमीअ में हिक बि॒ए जे दुख में शामिल थी मनु हल्को करे सघन था। 'चुल्ह ते सो दिल ते' वांगुर हिक बि॒ए में सिक ऐं प्यार में खाइन बि गडु॒ था। घणो करे उन्हन जा बुज़ुर्ग बु॒ढा आश्रम में शरन कोन था वठन। गडि॒यल परीवारन में फाइदा घणा ऐं मुश्कलातूं घटि आहिन। गडि॒यल परीवार में भाउर भेनरूं, भाजा॒यूं भाइटिया-भाइटियूं, चाचा-चाचियूं डा॒डो॒-डा॒डी॒, माउ-पीउ वगेरह डि॒सी दिल खे आनंदु मिलंदो आहे।
नुंहं जड॒हिं साहुरन में कदमु रखे थी त पतीअ सदिके हुन जा केतिरा नवां रिश्ता ठहन था ऐं नुंहं लाइ रिश्तन खे निभाइणु जरूरी आहे। जंहिं कुटुम्ब में प्यार जो अहसासु , हिक बि॒ए में विश्वासु ऐं गडु॒ रहण जी तमना आहे, उहो कुटुम्बु सदाईं खुश रहंदो आहे। ससु ऐं नुंहं ममता सां भरियल नारियूं आहिन। ग़लती थिए त हरको महसूस करे ऐं हिक बि॒ए जो ख्यालु करे।
'नुंहं त आहे घर जी सूंहं' नुंहं जो फर्ज़ु आहे त वड॒न खे इज़त ऐं नंढन खे प्यारु डे॒ मोट में नुंहं खे बि प्यारु कुर्ब ऐं पंहिंजाइप मिलणु खपे।
'मुंहिंजो तुंहिंजो' जी भावना त्यागे॒ छडि॒यूं, पोइ डि॒सो उन जो फलु केतिरो न मिठो ऐं सुठो थो निकिरे। हीअ ज़िदगी करम भूमी आहे, ससु ऐं नुंहं खे गडि॒जी परीवार खे सुर्ग॒ बणाइणो आहे। मर्द त झर जा झाटी आहिन, कड॒हिं किथे त कड॒हिं किथे। सुबुह जा निकिता रात जो वापस मोटन, ज़ाल ऐं माउ जो धरमु आहे त उन्हन खे घर जूं नंढियूं वडि॒यूं, घटि वधायूं न बु॒धाइन ।
हिक शाइर जो चवणु आहे त सुर्ग॒ अगर आहे त हिते आहे। जिन घरन जी ज़ालुन में एको आहे, प्यारु आहे, विश्वासु आहे, उते सुर्गु॒ आहे।
'परीवार मिठो त जगु॒ सुठो' कुटुम्बु सुधर्यो त संसारु सुधर्यो। उन्हीअ में ई परीवार, समाज, देश ऐं प्राणी मात्र जो कल्याणु आहे।

दया लखी जशनाणी
बैरक -2124, सिन्धूनगर-421005