‘‘बारनि खे सिन्धी भाषा सेखारण में माइटनि जी भूमिका’’ ते राजस्थान सिन्धी अकादमी पारां राज्य स्तरीय सेमीनार

‘‘बारनि खे सिन्धी भाषा सेखारण में माइटनि जी भूमिका’’ ते राजस्थान सिन्धी अकादमी पारां राज्य स्तरीय सेमीनार

अन्र्तराष्ट्रीय भाषा दिवस 21 फरवरी खां ब डींहं अगु 19 फरवरी आरितवार डिहारे जयपुर जे होटल माया इन्टरनेशनल में ‘‘बारनि खे सिन्धी भाषा सेखारण में माइटनि जी भूमिका’’ ते राजस्थान सिन्धी अकादमी

पारां राज्य स्तरीय सेमीनार जो आयोजन बिनि सत्रनि में कयो वियो। सेमीनार जो उद्घाटन जस्टिस इन्द्रसेन इसराणी, गुलाबपुरा नगर पालिका अध्यक्ष चेतन पेशवानी, अकादमी जे अध्यक्ष नरेशचन्दानी ऐं अकादमी जे सचिव दीपचन्द तनवानीअ लालसांई जी तस्वीर अगियां जोत बारे कयो अकादमी अध्यक्ष नरेश चन्दानी मुख्य अतिथि जस्टिस इसराणी खे ऐं अकादमी जे सचिव दीपचन्द तनवानीअ विशिष्ट अतिथि चेतन पेशवानी खे शाल ऐं माला पराऐ ऐं मूमेन्टो डई सनमानित कयो। 

सेमीनार जी शुरूआत कमला गोकलाणी ऐं साथियुनि सां गदोगद राजस्थान जे हर शहर खां कोठायल साहित्यकारनि कौमी गीत वन्देमातरम जे गायन सां कई। अकादमी अध्यक्ष सभनि जो स्वागत कन्दे अकादमी जी गतिविधियुनि जी जाण दिनि त विशिष्ठ अतिथि चेतन पेशवानीअ लेखकनि खे जमाने जे हिसाब सां नईं नईं तकनिकियुनि जो सहारो वठी बोली जे प्रचार प्रसार जी गाल्ह चई त मुख्य अतिथि जस्टिस इसराणीअ सलाह दिनि त असांखे पंहिंजी जमीन न आहे पर उन जी कमी असीं समाज मां वध में वध अफसर ठाहे पूरी करे था सघू ऐं अफसर ठहण में असांजी मातृ भाषा सभ खां वदी मददगार आहे। इनि जो पूरो फायदो वठण घुरजे। 

सेमीनार जे पहिरिये सत्र जी सदारत श्रीमति डा. कमला गोकलाणी कई त विषय ते पत्रवाचन कन्दे कन्हैयालाल अगनानी चयो त बारू त मुछु जो वार जेदहि मोड़ीस उदाह मुड़न्दो। हुन खे भले पंजाबी सेखारियो या गुजराती या मद्रासी या मराठी। पर जरूरी आहे बार खे सिन्धी मीडियम वारे स्कूल में दाखिलो करायजे या जहिं स्कूल में हिकु विषय सिन्धी हुजे उते। जे इहा सुविधा ब न हुजे त सिन्धी सेखारण वारिन कलासनि में बारिन खे मोकले करे सिन्धी सेखारण घुरजे।

सिन्धी भाषा सिखी सिन्धी विषय सां IAS,RAS ई न सिन्धी जा लेकचरार,प्रोफेसर, सिन्धी जा मासतर, सिन्धी अनुवादक, अनाउन्सर सवलाई सां ठई सघजे थो इहा गाल्ह बारिन खे समझायण घुरजे। बार सिन्धी में रचनाऊ, कहणायू, नाटक, कविताऊ वगैरा लिखी पढी करे पैसो कमाईण सा गद नालो भी कमाऐ सघे थो। माइटनि खे घुरजे त बारनि खे सिन्धी नाटकनि, कवि सम्मेलन या सिन्धी गीत संगीत जे कार्यक्रमनि में वठी वञण घुरजे ऐं बारिन खे सिन्धी सन्त महात्माउनि, शहीदनि ऐं स्वतंत्रता सेनानुयनि जी जीवणी सां वाकिफ करायण वास्ते चाहे देवनागरी या अरबी लिपि में अखबारू या किताब जरूर घुरायण घुरजनि ऐं सिन्धी गीत संगीत जा कैसेट वगैरह रखण ऐ बुधण घुरजनि। 

अगनाणी जे पत्रवाचन ते गोविन्द माया तबसरो पेशकन्दे चयो त महाभारत में कथा आहे त अभिमन्यु जदहि माउ सुभुद्रा जे पेट में हो तो अर्जुन सुभुद्रा खे चक्रव्यूह में घिरण जो तरीको बुधायो ऐं चक्रव्यूह मां निकरण जो तरीको बुधायण लगो त सुभुद्रा जी अखु लगी वई तंहि करे अभिमन्यु महाभारत जे युद्ध में चक्रव्यूह में घिरी त वयो पर निकरी कोन सघियो। अजु असां सिन्धी महान भारत मे फैहलजी विया आहियू ऐं असां जी माउ जी (मातृ भाषा) जी अख‍ि लगी वई आहे ऐं जे हांणे भी चक्रव्यूह मां न निकतासे त असांजी जाति ऐं बोली जो खातमो पको आहे। तंहिं करे जंहि ब घर में बार गर्भ मे अचे तदहि खां वठी जैसीं हू स्कूल न वञे घर में सिन्धी माहोल ठाहे छदण घुरजे। 

सत्र जे विशिष्ट अतिथि चन्दन सुखाणी मिडिया जो पूरो सहयोग खणण जी सलाह दिनि त कमल वासवानी चयो कि बारनि खे हिमथायण जा तरीका अपनायण घुरजनि। हाजरीनन मां श्री रमेश नारवाणी, राजेश खत्री, नवल बचाणी, केवल जेसवाणी ऐं इसर सिंह बेदी ब सुझाव दिंदे चयो त सोनारे वारी ठक ठक कन्दा रहो त ई गह घणजन्दा।

बीकानेर जे देवीचन्द खत्री जाण दिनि त हुनि पंहिजी पोट्री सां सिर्फ सिन्धी में गाल्हायण ते हुन जी माउ खे रोज 10 रूपया दियण करे रखिया आहिनि पर जे बी बोली में गालहाइन्दे बुधन्दुस त 10 रूपया कटिजी वेन्दस पर अजु तांई मुंहिजी नूंहं हिक दफो ब पैसा कोन कटाया आहिन। अगते जाण दिनि त सन्दस पोट्री स्कूल में हिन्दी या अंग्रेजी में कविताऊं बुधाये पहिरियों इनाम आणी दी आहे त घर में ब जदहि सिन्धी जी नई कविता याद करे बुधाऐ त कोई न कोई प्राइज दई हुनि खे हिमथाईन्दों अहियां ऐं पाण ब खुश थींदो आहियां। 

सागी रीत बे सत्र जी अध्यक्षता भगवान अटलानी कई ऐं पत्र वाचन अजमेर यूनिवर्सिटी में सिन्धी जे हैड आफ डिपार्टमेन्ट हासो दादलानी कई ऐं तबसरो ब्यावर जे अर्जुन कृपालानी कयो। खास मेहमान हुआ प्रकाश टेकवानी ऐं पनामा निवासी गंगाराम पुरसवाणी। हासे दादलाणी पंहिजे पत्रवाचन में बुधायो त 1943 में अंग्रेजनि सिन्धी बोली खे दाढो मथे चाढि़यो। रिचर्ड बर्टन ऐं एच.डी. सोले जो चवण आहे त शाह लतीफ जेदो महान कवि कोई कोन्हे ऐं सिन्धी जेदी समृद्ध भाषा शायद ही काई आहे। हुन चयो त जानवर ब पंहिजी बोली कोन छदीन्दों आहे। कुतो कदिह म्याँऊ-म्याँऊ कोन कन्दो त बिल्ली कदंहि भौं भौं न कंदी। पर असीं पंहिंजों नासूर पाणं पैदा कयो आहे। अर्जुन कृपालानी तबसरों पेश कन्दे चयो त बार जेको झटीन्दो

सो ही वन्डीदो। हाजरीनन मां पमो वाधवाणी, कमला गोकलाणी, आकशवाणी जयपुर जी पूजा, इसरसिंह बेदी, सुरेश बबलाणी, रमेश रंगाणी ब पंहिजा विचार बुधाया त बीकानेर जे सुरेश हिन्दुस्तानी दांह दिन्दे चयो त नाटक, गीत, संगीत जेके सिन्धी सभ्यता जा साधन आहिन ऐं कलाकार सुबह जे 7 वगे खां रात जे 11 वगे तांई पंहिजों टाइम दियनि था उन्हनि खां जदहि कोई इहो पुछन्दो आहे कि तूं कन्दों छा आहीं त दाढी तकलीफ थींदी आहे इनि समस्या जो ब कोई समाधन कढण घुरजे। 

अकादमी पांरा सेमीनार में सिन्धियत जी निस्वार्थ सेवा में लगल विलायत जे कन्हैया वासवाणी जो इन्द्रसेन इसराणी हथां ऐं उदयपुर जे राजेश खत्री अऊं बीकानेर जे देवीचन्द खत्री जो अकादमी अध्यक्ष नरेश चन्दाणी पारां शाल ऐं माला पाराऐ सनमान कयो वियो । सजे कार्यक्रम जो सुहिणो ऐं यादगार संचालन सिन्धी साहित्य सुरभि जे सम्पादक लक्ष्मण भम्भाणी कयो।

(सुजागु सिन्धी, बीकानेर तां खंयलु) 

---------------------------------