वासदेव मोहीअ जा चार ग़ज़ल
ग़ज़लु-1
छा वेही पंहिंजन सां ओरियूं
प्यारु असीं लुड़कन सां ओरियूं
हालु बुधाय़ूं छा दुनिया खे
सामीअ ज्यां मटकनि सां ओरियूं
जज़्बे खां ख़ाली, मथां रुठल
छा अहिड़न पत्थरनि सां ओरियूं
चिलविला लगनि सुपना पंहिंजा
मोटी कुझु बचपनि सां ओरियूं
पेच संवारिनि सविलाईअ सां
मूंझारा सुहिणनि सां ओरियूं
तुंहिंजो आधारु हुयो, न रहियो
मनु कहिड़े भगवन् सां ओरियूं
चंड जे अंदर में बि मेलु आ
उधिमा किंअ उजलनि सां ओरियूं
वण पोखिया तो केडा मोही
हरिका गाल्हि उनहिन सां ओरियूं
------------------------------
ग़ज़लु-2
मां अकेलो हुजां इऐं कडहिं कोन थिए
तुंहिंजे नेणनि जो जोड़ो सदा गडु हुजे
केडो काजलु लगलु, पो बि उजिलो लगे
अखि जी जादूगिरी, इऐं हली थी वञे
धुंधु ई धुंधु, चौतरफि माक पेई वसे
अक्खि तुंहिंजी तिखी उस जो डेखु डे
इऐं सुकल खूह ज्यां आहे तुंहिंजी निहार
पर अखियुनि में डिसे मस, बुडण थो लगे
ज़लज़ला पिया थियनि मुल्क में, हुनखे चौ
तकिड़ो तकिड़ो अखियुनि खे छिंभणि बंदि करे
रोज़ु दड़िका सहूं अखि जा इन आस में
मुमिकिनि आ अजु टांडो थधो थी वञे
सारो वहिंवारु जग जो हले अखि सां
अखि खुले सुबुहु, पलिकूं झुकनि जगु सुम्हे
------------------------------
ग़ज़लु-3
मुरक जी लीक हुजे थी तोसां
पीड़ा घर में ई रहे थी तोसां
हीर सां पन जो लुडणु, साहु खणणु
डिसु न क़ुदरत बि जुड़े़ थी तोसां
तूं परे हूंदे बि ख़ुश्बू डीं
गुल जी गाल्हि लगे थी तोसां
ज़हिर खे ज़हिरु नथो समिझीं तूं
पक ई मीरां का हुजे थी तोसां
माफ़ कज, दूर रहणु ठीकु आहे
भीड़ युग युग जी हले थी तोसां
शांति पाणी थो लगीं खूहन जो
छोल नाराज़ु रहे थी तोसां
आदुतुन तोखे कयो छा मोही
प्यास रिण जी बि विढ़े थी तोसां
------------------------------
ग़ज़लु-4
मुहब्बत लफ्ज़ु बुधंदे ई संभलजी वई
बिना तारनि जे काई राति चमिकी वई
हिंअर कहिड़ो डियूं डोरापो रिश्ते खे
"तव्हां" खां "तूं" चवण में उमिरि गुज़िरी वई
हुयूं केई गंढियूं पंहिंजी हयातीअ में
अनाड़ी कोशिशिनि में हरिका उलिझी वई
जबल केडा समाया पाण में तो मूं
नदी लेकिन अंदर खे चीरे निकिरी वई
लगे थो ज़िंदगी हुई, हेकिली बीठल
अलाए छा थियो, जो दिलि तां उतिरी वई
नदी ऐं समुण्ड जे मेलाप ते सोचे
नफ़े नुक़सान में उञ मुंहिंजी विचिड़ी वई
गणींदें केतिरा मोहीअ जा फिरंदड़ रूप
जिअण जी सध में, दिलि चालाकि बणिजी वई
------------------------------
No comments:
Post a Comment