--खीमन यू मूलाणी
झूमनि ऐं लहराइनि वण टिण,
भूंइ जी सूंहं वधाइनि वण टिण।
सडे सडे ककरनि खे उभ मां,
बारिश खूब वसाइनि वण टिण।
छाया डई थकल राहियुनि खे,
राहत था पहुचाइनि वण टिण।
गिही वञनि था ज़हरु हवा जो,
साफ़ हवा मोटाइनि वण टिण।
कएं सवादी मिठिड़ा मेवा,
माण्हुनि खे खाराइनि वण टिण।
खुशबूदार गुलनि सां धरती,
रंगा रंग बणाइनि वण टिण।
पखी पखण ऐं जीव जंत खे,
डई अझो निपाइनि वण टिण।
तरह तरह जूं जड़ियूं उपाए,
तन जा रोग मिटाइनि वण टिण।
आहिनि शुभ चिंतक सभिनी जा,
कंहिं खे कीन डुखइनि वण टिण।
अगर हणे को खेनि पथरु थो,
उन डे फलु उछलाइनि वण टिण।
सुठा न सडिजनि अहिड़ा माण्हू,
जेके कटे जलाइनि वण टिण।
No comments:
Post a Comment