राष्ट्रीय सिंधी कवि सम्मेलन, नई दिल्ली जो अखियुन डिठो अहिवाल

राष्ट्रीय सिंधी कवि सम्मेलन, नई दिल्ली जो अखियुन डिठो अहिवाल 

22 जनवरी 2012, डीं॒हुं आर्तवार, हेमूं कालाणीअ जे शहीदी डीं॒हं जे मोक़े ते दिल्ली सिंधी साहित्य आकादीमीअ पारां  राष्ट्रीय सिंधी कवि सम्मेलन जो आयोजन नईं दिल्लीअ में कयो वियो हो। नागपुर जा शायर डॉ. विनोद आसूदाणी बि इन कवि सम्मेलन में आमंत्रित हुआ। डॉ. विनोद आसूदाणीअ सां गडु॒ मुंहिंजो बि दिल्लीअ वञणु थियो। मूं पूरो कवि सम्मेलन बु॒धो। उते मूंखे जा॒ण मिली त इहो राष्ट्रीय सिंधी कवि सम्मेलन हर साल थींदो आहे ऐं इन राष्ट्रीय सिंधी कवि सम्मेलन जो वडे॒ पैमाने ते प्रचार प्रसार कयो वेंदो आहे।  खर्चु बि चङो ईंदो आहे। इंतिज़ामु बि सुठो हूंदो आहे। इहे सभु गा॒ल्हियूं बराबर हुयूं, मूं इहो महिसूस कयो। पर कुझु तक़लीफ़ूं पिण महसूस कयूं।

            राष्ट्रीय स्तर जे कवि सम्मेलन में के शायर प्रदेश स्तर त छा, मकानी स्तर जा बि कोन पिए लगा॒। 25 शायरनि जी भीड़ में फ़क़त् 8-9 शायरनि ई शायरु हुअण जो अहसासु करायो। बाक़ी शायरनि जी शायरी किथां बि शायरी नथे लगी॒। वडो॒ अजबु त तड॒हिं लगो॒ जड॒हिं दिल्लीअ जे हिक नौजवान शायर(?) हिन अदब जी महफि़ल में निहायत बे-अदबीअ जूं के सिटूं पढ़ियूं। उहे सिटूं हिते दुहिराइण लाइक़ु न आहिन।  बी॒ तकलीफ़- प्रोग्राम जो वक़्त खां अटिकल 2 कलाक देर सां शुरू थियणु, मुख्य महिमान जे इंतिज़ार में अञा देर करणु, सचपचु डा॒ढो ताजुब पियो लगे॒। बि॒ए बि घणई कमियूं हुयूं। बु॒धण वारा माण्हू 100 खां वधीक कोन हुआ। शायद हर साल प्रोग्राम इन्हीअ रीति थींदो हूंदो, पोइ बु॒धण वारा 100 खां वधीक अचणु बि न घुरिजन! कवि सम्मेलन जी अध्यक्षता करण वारे शायर श्री आनंद खेमाणीअ बि पंहिंजी शायरीअ में तन्ज़ कंदे चयो त केतिरन माण्हुन शायरीअ खे ज॒णु धंधो बणाए छडि॒यो आहे।

            हिन राष्ट्रीय स्तर जे कवि सम्मेलन जे बारे में गा॒ल्हियूं त घणेई आहिन लिखण लाइ, पर वधीक छा लिखिजे? असां त बस उम्मेद करे सघूं था त ईंदड़ साल दिल्ली सिंधी साहित्य अकादमी मथे जा॒णायल कमियुन डे॒ गंभीरता ऐं संजीदगीअ सां ध्यानु डीं॒दी ऐं आईंदह इन्हन ग़ल्तियुन खे न दुहिराईंदी। बस!

- कनयो शेवाणी

जी-9, बैरागढ़, भोपाल

मोबाईलः 09827201225

 --------------------------------------------------------------------------------