‘‘दीवान गोरधनदास गोपलाणी’’ नाटक श्रोताउन खे खिलाए-खिलाए ऊंधो कयो
भोपाल, देवनागरी लिपीअ में निकरंदड़ मध्यप्रदश जी सिकीलधी सिंधी माहवार अख़बार ‘‘अखण्ड सिंधू संसार’’ पारां 18 डिसेम्बर ते भोपाल जे रविन्द्र भवन में आयोजित नाट्य ऐं सम्मान समारोह तहत ‘‘सिन्धु सखा संगम, मुम्बई’’ ड्रामा ग्रूप पारां उल्हासनगर जी मशहूर ड्रामा हिदायतकार जूली तेजवाणीअ जे डॉयरेक्शन में हास्य नाटकु ‘‘दीवान गोरधनदास गोपलाणी’’ पेश कयो वियो।
मूल मराठी नाटक जो सिंधीकरण श्री किशोर लालवाणी अहिड़े त असिराइते ढंग सां कयो आहे जो इहो तर्जुमो न लगी॒ करे मूल सिंधी नाटकु लगी॒ रहियो हो। नाटक जी कहाणी इहा हुई त घर जे नंढे पुट जे शरीर में रोज़ शाम जो संदसि सुर्ग॒वासी डा॒डे॒ दीवान गोरधनदास गोपलाणीअ जी आत्मा अची वासो कंदी हुई। इन वाकि़ए सां घर में जेके हालतूं पैदा थियनि थियूं ऐं उन्हनि जे करे घर जे भातियुन मथां कहिड़ियूं-कहिड़ियूं मुसीबतूं अची नाजि़लु थींदियूं हुयूं, उन जे चित्रण सां नाटक में एतिरी त खिल मज़ाक अज़ खुद पैदा थिए थी जो डि॒संदड़ खिलण खां सवाइ पाण खे रोके नथे सघिया।
नाटक में पंहिंजी एक्टिंग जो जलवो डे॒खारींदड़ कलाकार हुआ- सर्वश्री जय हीरो, जीतू वज़ीराणी, दिनेश आहूजा, राकेश कारा, टीकू मंगताणी, गिरीश आहूजा, जयश्री थावाणी, जूली तेजवाणी ऐं रेश्मा मूलचंदाणी। लाईट ज़रीए नाटक जे नज़ारन खे रूह बख्शियो दिनेश आहूजा त संगीत सां रौनक़ पैदा कई दौलत रूपाणीअ।
समूरे प्रोग्राम जो सुंदर ऐं विंदराईंदड़ संचालनु ‘‘अखण्ड सिन्धु संसार’’ सम्पादक ऐं मालिक ज्ञानचंद लालवाणी ऐं नाटक कलाकार भावना अगनाणीअ गडे॒ करे कयो।
- भग॒वान बा॒बा॒णी
No comments:
Post a Comment