सिर्फ सिंधी नालो हुअण करे असांखे सिंधी सडा॒इण जो हक़ु कोन थो मिलेः डॉ. विनोद आसूदाणी
भोपाल, ‘‘असांजे नाले पुठियां सिंधी आकहि लगल आहे, सिर्फ इन करे ई असां पाण खे सिंधी नथा सडा॒ए सघूं। असां जेसताईं पंहिंजे घर में ऐं पाण में सिंधी भाषा में नथा गा॒ल्हायूं तेसताईं असांखे सिंधी चवाइण जो को बि हक़ु कोन आहे। छो जो असां सिंधु प्रांत में रहूं कोन था, असांजो खाधो-पीतो, पहिराणु वगै़रह बि सिंधी कोन आहे सिर्फ हिक बो॒ली ई आहे जंहिंजे दम ते असां पाण खे सिंधी कोठायूं था, जेकड॒हिं असां उहा बि कोन था गा॒ल्हायूं त पोइ असांखे ख़ुद खे सिंधी चवाइण जो ढोंगु न करणु घुरिजे।’’ इहे विचार सिंधु संस्कृति परिषद पारां शहीद हेमूं कालाणी जे ब॒लिदान डीं॒हं जे मोक़े ते आयोजित हिक प्रोग्राम में नागपुर निवासी मशहूर साहित्यकार, मनौवैज्ञानिक, ऐं विद्वान प्रोफेसर डॉ. विनोद आसूदाणीअ मौजूद श्रोताउन खे खि़ताबु कंदे ज़ाहिर कया।
हिन मौक़े ते परिषद पारां हेमूं कालाणीअ जे जीवन बाबत हिक मज़मून चटाभेटी स्कूली ऐं कालेजी शागिर्दन जे विचमें रखी वई हुई। चटाभेटीअ में इनाम खटंदड़न विद्यार्थियुन बि इन प्रोग्राम में पंहिंजा चटाभेटीअ में लिखियल मज़मून पढ़िया। श्री अशोक बूलाणीअ जी हिदायतकारीअ में कीरत बा॒बा॒णीअ पारां लिखयलु नाटक ‘‘सूरीअ सडु॒ कयो’’ ते आधारित हेमूं कालाणी जी शहादत ते हिकु नाटकु बि पेश कयो वियो।
- भग॒वान बा॒बा॒णी
