ग़ज़ल
सुख समूरा दौर डि॒ठा तो,
पर, पंहिंजा सभु सूर डि॒ठा तो।
किथे डि॒ठइ अहसास ज़िगर जा,
दुनिया जा दस्तूर डि॒ठा तो।
उघियइ अची हिअं ग़म जा गो॒ढ़ा,
माणिक - मोती मूर डि॒ठा तो।
पेही पाण में वेठो आहीं,
जा॒ण न कहिड़ा नूर डि॒ठा तो।
इश्कु अणांगी मंज़िल, मिठिड़ा,
चाउंठि ते चकचोर डि॒ठा तो?
डि॒संदो ई डि॒संदो रहिजी वएं,
अहिड़ा कहिड़ा तोर डि॒ठा तो?
मौत सुम्हारे छडि॒यो मिड़ेई,
केडा॒ हा मशहूर, डि॒ठा तो?
वेठा वाटुनि ते वाझाइनि,
पल-पल पाग॒ल पूर डि॒ठा तो?
जेके जिन्दुड़ी खे झूरे व्या,
नींहं डि॒ना नासूर, डि॒ठा तो?
अंदिरां जे वीरान वेचारा,
बा॒हिर खां मामूर डि॒ठा तो?
सार पले सभु सुख घोरे व्या
ग़मवारा मग़रूर, डि॒ठा तो?
माठि खे ई वेढ़े, वेगा॒णा
वेठा थई मजबूर, डि॒ठा तो।
भीला जिनिजा भाग॒ बणी प्या,
केडा॒ हा माज़ूर डि॒ठा तो?
लाम लाम ते, गि॒लन चपन ते,
ब॒ह-ब॒ह ब॒हिकनि बू॒र डि॒ठा तो?
पीअण बिना मदहोशी मइ जी,
मूं जहिड़ा मख़मूर डि॒ठा तो?
(शाइर जे किताब 'अञा यादि आहे' तां)
----------------लक्ष्मण दुबे
गांधारी गली, क़ाज़ीवाड़ा,
ज़ूनागढ़-362001
फोन - 09323735932
