प्रतिष्ठा

लघु कथा

लेख़कः संजय कुमार चतुर्वेदी

अनुवादः देवी नागरानी      

अजु मूँ अख़बार वेठे पढ़ी, उन्हीअ वेल शेख अली अची पहुतो। ईदें ई चयाईं, “शाम जो मुंहिंजे घर भोजन में अची शरीक थिजांइ।”

मूँ हुनखां पुछो, "छाजो भोजन?"   त  हुन जवाब डिनो, "माउ जो चालीहो आहे।“  

मूँ शेख़ अली खे चयो, "भाउ, तो जीयरे माउ जे खाधे-पीते ऐं इलाज में कंजूसी कई, माउ वेचारी हितां–हुतां पिनी खाईंदी रही, हा‍णि छो पैसो ख़र्च करे रहियो आहीं?"

इन ते  शेख़  मूँ डे निहारींदे शोखीअ  सां चयो,  "माउ बुढ़ी हुई,  मरणो होसि, सो मरी वई। चालीहे ते सभई रिश्तेदार ईंदा, मान-प्रतिष्ठा बरक़रार रखण लइ ख़र्चु त करणो पवंदों न।"

लघु कथा

चमत्कारु

हिक डींहं गणेश मंदर जे अगियां घणी गर्दी हुई. मंदर खां वठी 
परते वारी झोपड़पट्टीअ ताईं भगतन जे हिक हथ में खीर जो 
कटोरो ऐं बिए में चमचो हुयो. सभु क़तार में बिही करे गाल्ह‍ियूं 
करे रह्या हुआ.
”छा त चमत्कार आहे, गणेश जी खीर प्यो पिए.”
उते ई हिकड़े फ़कीर जो बुखायल बारु सिकायल नज़रुन सां तिन 
खे चई रह्यो हो, ”इन में कह‍िड़ो चमत्कार आहे? मुंहिंजो नालो ब‍ि 
गणेश आहे, मां ब‍ि खीर पी थो सघां, विश्वास नथो अचेव त 
पियारे डिसो.”
लेखक: घनशयाम अग्रवाल
अनुवादः देवी नागरानी

dnangrani@gmail.com

  ठोड़ो- लघुकथा 

हू छहें दरजे खां मूसां गडु पढ़ंदो हो. हमेशा पह‍िर्यों नंबर ईंदो हो, पर पोइब‍ि सजो कालेज हुनखे सनकी मञींदो हो. हिक प्रोफेसर त हिक दफ़े हुन खे रजिस्टर्ड चर्यो ब‍ि चयो हो. कड॒हिं  बिना मुच्छुन जे डाढ़ी रखंदो हुयो त कड॒हिं मखि छाप मुच्छूं. ‍िबए ब‍िए किस्म जूं टोप्यूं पाइण ब‍ि हुन जे शौंक में शामिल हुयो.

      पुराणी सुञाणप जे बावजूद ब‍ि मूंखे हुन सां को खास मोहु कोन हुयो. सच त इहो आहे कि हुन खे नापसंद करण जो भरमु मुश्किल सां लिकाए सघंदो हुयुस‍ि. कुछ डींहं  हू किस्म किस्म जूं पगिड़ियूं पाए डेखारींदो हुयो, पर  तडहिं त हद ई थी जडहिं हू मथो कूड़ाए पंहिंजे क्लास में ड‍िठो वयो.

  प्रशांत चिढ़ी करे चयो " मथो त माण्हूं  तड॒हिं कूड़ाईंदो आहे जडहिं मथे में जूं पइजी वञन या जडहिं पीउ मरी वञे."

हू उथी क्लास खां बाहिर आयो. हयातीअ में हू पह‍िर्यों भेरो मूंखे उदास लगो. प्रशांत जी गाल्ह‍ि मूंखे ब‍ि ख़राब लगी, सो हुन खे छिरब डई मां बाहर आयुस. हुन जे अख्युन में लुड़क हुया. मूं हुन जो दुख घटाइण जे ख़्याल सां चयो "किन माणहुन खे गाल्हाइण जो डांउ न ईंदो आहे. तूं हुन जी गाल्ह‍ि ते ध्यान न डे."

   हुन लुड़क उघ्या,  त मूं खिल कंदे चयोमांस " हूंअ तूं बुरो न मञंजइ, वार वधाए छड‍ि, मथो कूड़ाए कैंसर जो मरीज़ प्यो लगीं."  मुंहिंजी गाल्ह‍ि बुधी हू मुरक्यो. असीं बई टहकु डई खिल्यासीं. अजु हुन जो सतेतालियों जन्म डींहुं आहे. मथो कूड़ाइण बइद‍ि कुछ महीना हू कैंसर सां जंग जोटींदो रह्यो.

लेखकः अनुराग शर्मा

अनुवादः देवी नागरानी

dnangrani@gmail.com 

लघुकथा

लघुकथा

धारणा

लेखक - रामेश्वर काम्बोज 'हिमांशु'

सिन्धी अनुवाद - देवी नागराणी

मां हिन शहर में बिल्कुल अनजान हुयुस. काफी डुक-डोर करे कंहिं तरह पासी मुहल्ले में हिकु मकान गोल्हे सघ्युस. टियों डींहुं ई कुटिंबु शिफ़्ट कयो हो. गाल्ह‍ि गाल्ह‍ि में आफ़िस में ख़बर पई त मां पंहिंजे कुटुंब सां पासी मुहल्ले में शिफ़्ट करे चुको आह्यां. वड़े साहब छिरकंदे चयो -‘तव्हां पंहिंजे परिवार सां हिन मोहल्ले में रही सघंदा.’

‘छा कुझ गड़बड़ थी वई आहे सर?’ मूं हैरानीअ सां पुछो.
‘ तमाम गंदो मुहल्लो आहे. हिते घणो करे हर डींहं कुझ न कुझ लफड़ो थींदो रहंदो आहे. संभाल सां रहणो पवंदुव.’ साहब जे मथे ते चिन्ता जूं रेखाऊं उभर‍ियूं--‘हीउ मुहल्लो गन्दे मुहल्ले जे नाले सां बदनाम आहे. गुण्डागर्दी ब‍ि कुझ घणी आहे उते.’
मां पंहिंजी सीट ते अची वेठो ई हुयुस त वडो बाबू अची पहुतो-‘सर तव्हां मकान गन्दे मुहल्ले में वरतो आहे. ’
‘लगे थो मूं मकान वठी ठीक न कयो आहे.’ -मूं पछतावे जे सुर में चयो.
‘हा, सर ठीक न कयो आहे. ही मुहल्लो रहण लायक नाहे. जेतरो जल्दी थी सघे, मकान बदले छडियो’ -हुन पंहंज्यूं अनुभवी अख़्यूं मूं ते टिकाए छडियूं.
हिन मुहल्ले में अचण जे करे मां घणी चिंता में पइजी व्युस. घर जे साम्हूं पान-टाफ़ी विकणण वारे खोखे ते नज़र पई. खोखेवारो कारो-कलूटो मुछुनवारो, हिक दम गुण्डो थे नज़र आयो. कचर-कचर पान चबाईंदे हू अञा ब‍ि घणो भवाइतो पे लगो.
सचमुच मां ग़लत जगह‍ि ते अची व्यो आह्यां. मूंखे सजी रात ठीक सां निंड न आई. छित ते कंहिंजे टिपण जो आवाज़ु आयो. मुंहिंजो साहु सुकी व्यो. मां डिजंदे डिजंदे उथ्युस. बिना आहट जे बाहिर आयुस. दिल ज़ोर सां धड़की रही हुई. खुड ते नज़र वई, उते हिक बिल्ली वेठी हुई.
अजु बिपहरन जो बाज़ार मां अची करे लेटियुस त अख‍ि लगी वई. थोड़ी देर में दरवाज़े ते खड़को थ्यो. दरवाज़ो खुल्यल हो, मां हड़बड़ाइजी करे उथ‍ियुस.
साम्हूं उहोई पान वारो मुछन्दर बीठो मुरकी रह्यो हो. बिपहरन जो सन्नाटो हुयो. मूंखे कट्यो त खून ही न हुजे.
‘छा गाल्ह‍ि आहे? मूँ पुछ्योमांस
‘शायद तव्हांजो ई बार हूंदो. टाफ़ी वठण लाइ मूं वट‍ि आयो. हुन ही नोट मूंखे डिनो’-चवंदे हुन पान वारे सौ जो नोट मूंडे वधायो. मां छिरक्युस. ही सौ जो नोट मुंहिंजी ख़मीस जे खीसे में हो. डिठो - खीसो खाली हो. लगे थो सोनूअ चुपचाप मुंहिंजे खीसे मां सौ जो ही नोट कढी वरतो हो.
‘टाफ़ीअ जा घणा पैसा थ्या?"
‘सिर्फ़ पन्जाहु पैसा, वरी कडहिं वठंदोसांव"- हू कचर-कचर पान चबाईंदे मुरक्यो. हुन जो चहरो उजली मुरक में वेढ़ियल हो. -‘चंङो बाबू साहब, प्रणाम ! ’ चई हू मोटी व्यो.
मां ख़ुद खे हींअर तमाम घणो हलको महसूस करे रह्यो होस.

देवयाणी

देवयाणी

मूल लेखिका -डॉ मिथिलेश कुमारी मिश्र

सिन्धी अनुवाद - डॉ ध्रुव तनवानी

जंह‍ि मनु माणहुअ जो गौरव

धरती सां बधल आहे

हू माणहू महा सजण आ

हू सभ खां श्रेष्‍ठ ए वडो आ ।1

सिरष्टीअ में सचु इहो आ

माणहूअ खां वडो न कोई

उन में अण डिठी अणजाण

अदभुत समझ अथस‍ि सुतल।1

नर समझे पाण खे नारायण

उन जो इत‍िहास अनोखो आ

सुख दुख लाहीअ चाढ़ीअ में

उन जी चाल घणी गज़ब थस‍ि।1

माणहूअ जे मधुर मिलन में

कलप जी अमर आखाणी

‌‌‍ धरतीअ जे अंदर मन में

अणगणियल लिकल निशानी ।1

ठाहे साहित्य अनोखो

रसु विझी सजायो अथई

भावना जो रूप डिनो आ

रुप खे वाणी डिनी आ ।1

माणहूअ जी रचना करे

खुद पाण विधाता थियो वाहरो

करे लख हीला तब मञु

हाणे न उन जो को वसीलो।1

सतो रजो तमो जो संगम

नित जीवन जी नंढी काया

पर जसु बरफ जी चोटीअ वांगे

देवताउन बि शीशु निवायो़ ।1

हू सदा करम जो साधक

उपासक परम पिता जो

इन करो जग में फहरायो

उन जी जीत जो झंडो।1

पंहिंजे मेहनत जे ब़ल सां हू

करे सघे थो अणकयल बि

हुन सां सभु सुर्गु आ हिते

धरतीअ जी कुंड कुंड ते।1

गोल्डन बैल्ट :ख़लील जिब्रान

सलामिस शहर डांहुं वेंदे बिनि माणहुन जो पाण में मेलाप थ्यो, बिपहर ताईं हू हिक नदीअ वटि पहुता, जंहिं ते कोई पुल न हुयो. हाणि उन्हन वटि ब वाटूं हुयूं, तरी करे नदी पार करणु या बी का वाट गोल्हे करे वञणु.

"तरी करे ई था हुन भरि हलूं," उन्हन हिक बे खे चयो, " नदी का घणी चौड़ी न आहे."

उन्हन मां हिक माणहूअ जो सुठो तैराक हो, विच सीर में पाण ते काबू न रखी सघ्यो, ऐं पाणीअ जे तेज़ वह्कुड़े में वहण लगो. ‍िबयो माणहूं , जंहिं खे तरण जो अभ्यास न हो, आराम सां तरंदे वञी ‍िबए किनारे पहुतो. उते पहुची हुन पंहिंजे साथीअ खे पंहिंजे बचाव लइ हथ पेर हणंदो डिठो, सो हू वरी नदीअ में टिप्पी करे हुन खे जोखे बिना किनारे ताईं वठी आयो.

"तो चयो तोखे तरण जो अभ्यास नाहे, पोइ ‍िब तूं तमाम सवलाईअ सां नदी पार करे वएं." पह्रियें माण्हूअ पुछो.

"दोस्त" बिए माणहूअ चयो, "मुहिंजी चेल्हि (कमर) सां बधलु हीउ बेल्ट डिसीं थो, हीउ सोनन सिक्कन सां भर्यल आहे, जिन खे मूं सजो सालु मेहनत करे पंहिंजीअ ज़ाल ऐं बारन जे लइ कमायो आहे. इन्हीअ करे मां सवलाईअ सां नदी पार करे वयुसि. तरण वक्‍त पंहिंजी ज़ाल ऐं बारन खे पंहिंजे कुल्हन ते महसूस पे कयो."

• सिंधी अनुवादः देवी नागरानी
  

dnangrani@gmail.com

ब॒ कहाणियूं

ब हिंदी कहाणियूं
लेखक - सुनील गज्जाणी
sgajjani@gmail.com
सिन्धी अनुवाद -देवी नागराणी
dnangrani@gmail.com

''उमिर''

उन पीर मर्द जी उमिर लगभग ६०-६५ हुई, वधीक‍ बि थी सघे थी. पर पाण खे जवान डेखारण जी चाह में हू वारन में खिजाब लगाईंदो हो ऐं मुंहं में नकली डंद बि पाईंदो हो.

‘‘यार माँ कल जी घटना खे भुलाए नथो सघां डिसंदे-डिसंदे अमित दुनिया छडे हल्यो वयो.''

‘‘ असीं सब वेही मोज मस्ती ही करे रह्य हुयासीं कि अचानक हुन खे उल्ट‍ियूं कंदों डिसी दंग थी व्या हुयासीं. असीं जल्दी-जल्दी हुन खे हस्पताल वठी हल्यासीं, पर इलाज जे विच में ही हू असांखां ........’’ चवंदे-चवंदे हू रुअण लगो

नाई जी दुकान ते हू नौजवान गाल्हियूं करे रह्य हुआ.
‘‘हुनजी उम्र केतरी हुई.‘‘ बुढे पुछ्यो

‘‘इहाई कुछ २२-२३ साल..।‘‘ हिक चयो
बुधी करे हू पीर आरसीअ में पाण खे डिसंदो रहयो, पोइ अचानक उथी बीठो ऐं दुकान खां बाहिर निकरी व्यो .

‘‘अरे राम प्रसाद! डाई न कराइणी आहे छा?’’
दुकानदार आवाज डिनस.

अजु राम प्रसाद पंहिंजी उम्र जे मुताबिक डिसण में ईंदो आहे.

लगभग डेढ-ब महिना थी व्या आहिन, उन डींहं खां पोइ न त हू वारन में खिजाब लगाईंदो आहे ऐं न ई नकली डंद.

**
'' प्रार्थना ''

भारत ऐं श्रीलंका जे विच दंबुला में हलंदर 20 - 20 ‍क्रिकेट मैच रोमांचक मोड़.. स्थिति में हो. 12 सालन जी गुडी मूं साणु गडु वेही मैच डिसी रही हुई हालांकि ‍क्रिकेट जो हुन खे एडो ज्ञान न हुयो . मां टीवी स्क्रीन ते अख्यूं खोड़े उकीर सां पे मैच डिठी .

‘‘पापा ........ छा इंडिया खटंदी ? ‘‘

‘‘पुट ! खबर नाहे, पर मैच जबर्दस्त रोचक हली रही आहे ऐं भारत जा ब विकेट बाकी आहिन , ऐं हाण आखरी चइन बालुन में ब रन ठाहिणा आहिन.‘‘

मलिंगा बाल उछ‍िल्यो, ज़हीर खा़न स्ट्रोक हंयो पर बदकिस्मती, जयसूर्या चार कदम तेजी सां अगियां वधी शानदार नमूने सां बाल कैच करे वरतो. खचाखच भरयल स्टेडियम में खामोश वेठल दर्शको में हिन कैच आउट, जबर्दस्त जोश भरे छड‍ियो.

‘‘पापा छा हींअर इंडिया खटंदी ?‘‘

‘‘थी थो सघे ‘‘

मलिंगा टियों बाल उछ‍िले नएं बल्लेबाज ईशान्त शर्मा जो ध्यान छिकायो पर रन वरी ब‍ि न ठही सघ्यो.

हाण ब बाल ऐं ब रन ............. मुंहिंजी धड़कन तेज़ थी रही हुई

‘‘पापा सीरियस छो थी व्या आह्यो .......... चांहिं थधी थी रही आहे न ?‘‘

‘‘पुट असां खे खटण लाइ बिन बालुन ते ब रन खपन . मैच जो नतीजो कुछ ब‍ि थी थो सघे.‘‘

‘‘पापा अगर मां प्रार्थना कयां त इंडिया खटी वेंदी ?

‘‘मन सां कयल प्रार्थना जो असर त थीन्दो आहे ‘‘

मुंहिंजे जवाब खां अगु ई हूअ प्रार्थना जे भाव मे वेही रही. ओडी महल ई पवेलियन ते हिक दृश्य देखार‍ियो व्यो जंहिं में हिक छोकरी प्रार्थना भाव में वेठी हुई .

मलिंगा हाण आखिर जो बियो बाल उछ‍िल्यो, ईशान्त शर्मा हलके ढंग सां पुश कयो ऐं तकडो़ डुकी करे हिक रन ठाहे वरती. मैच हाण बराबरीअ ते अची वई हुई.
डिसंदड़न जो जोश जलवे ते हो , हाण हिक बाल ऐं हिक रन..बस पोइ ख़टण जो ऐलान! ....

मलिंगा आखिरी बाल उछ‍िल्यो, भज्जीअ बल्लो हलायो मगर बाल बल्ले खे छुई न सघ्यो. मैच टाइ थी व्यो.....मूंखे लगो शायद ब प्रार्थनाऊं पाण में टकरायूं आहिन.