गुमान

कविता

गुमान

हिक डींहं,

हिक वडे वण ते,

उनजी पाड़ ते ,

हिक नंढी बूटी निकती,

वण पंहिंजी बची समझी ,

उन खे सहारो डिनो ,

उस में,

थधि में ,

मींहं में ,

आंधी तूफ़ान में ,

हूअ उनजे तन सां लिपटण लगी ,

वधंदी वई,

एतरो वधी वई ,

जो सजे वण ,

जो कदु पाए वई ,

हाणे गुमान थियुस‍ि ,

त मां केतरो वेठी वधां?

ऐं बुढो वण ,

ओतरो ई ओतरो ?

उन रात ई एतरो तूफ़ान आयो !

जो आसे पासे जा सभु बूटा ,

नासु थी व्या,

रुगो हू वणु बच्यो ,

लता मरंदे मरंदे चयो !

अबा मूंखे माफ़ कजां

जंहिं सहारो डिनो,

काश उन ते न खिलां हां?

-- डा. ध्रुव गुरबानी तनवानी , रांची
<tanvanid@yahoo.co.in>

ग़ज़ल

ग़ज़ल

चंड खे ककिरीअ छुहियो हो,

चांदिनी जो मुंहुं फिरियो हो.

मुख हंया नारा, खजिया हथ,

मनु जुलूसनि में दुखियो हो.

डाढ सदिमनि जी तपति में,

लुड़िकु अखि में किथि बचियो हो.

ख़ाकि थ्या सुपना सभेई ,

कंहिं नज़र कारीअ डंगियो हो

फ़र्श खे थे दर बुधायो,

शहर डाढो तिरितिरियो हो.

ज़िंदगीअ खे वक्तु पकिड़े,

जणु मदारीअ ज्यां हल्यो हो.

रोज़ु थी खाली वञे थो,

पेट जो मटु मूं भरियो हो.

प्यास हुई मजबूर केडी,

समुंडु जो खारो बणियो हो.

चीख़ गूंजाया कईं शक,

राति बसि गडु डपु रहियो हो.

ज़िंदगी मुरिकण लगी हुई,

सुब्हु जीअं घर में घिड़ियो हो.

हर नसीहत ते खिल्यों थे,

तूं चवीं थो हू चरियो हो.

--खीमन यू मूलाणी

A- NEW14/134,

BAIRAGARH, BHOPAL-462030

MOBILE- 09827343735

ग़ज़ल

खीमन यू मूलाणी

पल पल सूर पुराणा आहिनि,

टिमि टिमि टिमि टांडाणा आहिनि.

आस उमेद अञा रोशन आ,

छा थ्यो टहिक उझाणा आहिनि.

रस्तनि पेरनि साणु निभायो ,

चौंकनि वटि पर माणा आहिनि.

मुंहिंजा गीत ग़ज़ल ऐं वायूं,

खु़दि सां जणु ओराणा आहिनि.

रुगो॒ सुञाणनि था अंगनि खे,

जिनि वटि टूल विहाणा आहिनि

सभई शहर स्याणा आहिनि,

दर्दनि जा आडाणा आहिनि.

तेसीं रहंदी सिन्धियत जेसीं,

झूलणु ऐं बहिराणा आहिनि.

सिन्धी चमकनि था मोतियुनि जां,

तोड़े दाणा दाणा आहिनि.

हर माण्हूअ वटि हूंदा डाढा,

यादुनि जा सांधाणा आहिनि.

नेठि त मंज़िल ते रसंदासीं,

बोल न हीउ बा॒राणा आहिनि.

हाणोका जे पल ऊंदाहा,

रोशन संदमि सुभाणा आहिनि.

तन्हा

तन्हा

-वासुदेव निर्मल
vasudev.nirmal@gmail.com

सिंधी बुढे जे मौत सां जलन था सिंधी किताब.

पोखियो अखिरोटन जो वणु पंहिंजन पोटनि लाइ.

शादी आहे लाटिरी, जंहिंखे लगे सो लालु.

क़र्ज़ु जो डींदें दोस्तन खे, यारी वेंदी टुटी.

ख़ामोशी आ ज़ाल जो सुठे में सुठो लिबासु.

शत्रु मुंहिंजे शत्रूअ जो, आहे मुंहिंजो मित्रु.

हाथी मुश्किल में हुजे ऐं डेडरु लतूं हणेसि.

मुंहिंजी माउ

मुंहिंजी माउ

हिक भेरो कोई मूंखे मुंहिंजी माउ सां मिलाए!

जिते हूअ मुंहिंजो इन्तजार कंदी मिले

मूंखे डिसी तए में फ़ुलको विझण लाइ भजे

मां रड़ियूं कयां, फ़ुलको पचाए छोन थी रखीं?

मूंखे छिती बुख अचण सां ई लग़ंदी आहे

हूअ चवे तोखे कोसो फ़ुलको वणंदो आहे।

अहिड़ीअ देवी माउ सां कोई मूंखे मिलाए॥

सुबुह थियण सां गाडे वारे ख़ा जमूं वठे

वक्त कढी धोई साफ़ करे फ़िर‍िज में रखे

मंझद जो सुम्हण महल आणे चवे खा

मां नखरेली रुखो थी चवां मूंखे न वणंदा आहिन

हूअ चवे तोखे फ़ाइदो कंदा ब ट्रे खाई छडि।।

अहिड़ीअ देवी माउ सां कोई मूंखे मिलाए।

छंछर शाम वारन में सीरन में तेल विझे

आर्तवार डींहं चवे अचु मथो व‍िंह्जारांइ

मां नखरेली रुखो थी चवां वार मुंझंदा आहिन

हूअ चवे अचु मां थी वारन खे सुल्झायांइ।

अहिड़ीअ देवी माउ सां कोई मूंखे मिलाए।

मां पढ़ण में हुश्यार ए मेहनती हुअस‍ि

माउ पीउ जी लाडली बि घणी हुअस‍ि

बीअन सां मुंहिंजे पढ़ण लाइ विढ़ंदी

हूअ चवे मां हिन खे सुम्हंदो न थी डिसां

अहिड़ीअ देवी माउ सां कोई मुखे मिलाए।

--डा ध्रुव गुरबाणी तनवाणी

tanvanid@yahoo.co.

ग़ज़ल

ग़ज़ल

गाल्हि संदसि अणपूरी हूंदी,

आई इअं न भंभूरी हूंदी

पूजा पाठ करे रोज़ानो,

अञा बि आस अधूरी हूंदी

गोठु विसारे छडियो अथाईं,

मिलंदी उते मज़ूरी हूंदी

फोनि करे थसि जल्दु घुरायो,

शायदि गाल्हि ज़रूरी हूंदी

बारु बुढे खे प्यो थो डाढे़,

माउ डिनी मंज़ूरी हूंदी

किअं बि खटे थो बाज़ी, उन वटि

अखरु न हूंदो, भूरी हूंदी

घणे वक्त खां पोइ आयो आ,

मन में का मजबूरी हूंदी

डोहु तईअ खे डिनो त हुन, पर

चई न गाल्हि समूरी हूंदी

--खीमन यू मूलाणी
A-NEW14/134,

BAIRAGARH, BHOPAL-462030

MOBILE- 09827343735

मां सिन्धी आहियां

मां सिन्धी आहियां
अचो त फखुर सां उचारियूं ,
असीं सभु सिन्धी अहियूं .
तूं बि सिन्धी मां बि सिन्धी,
पोइ छो था वेही शर्मायूं !
सडाइणु सिन्धी, को गुनाहु त कोन्हे,
पोइ छो था पाण घबिरायूं!
शाह, सचल, सामीअ जा मुरीद -
'मोहन जे दड़े' जा वारिस आहियूं!
कई हिंद लाइ सिंध कुर्बान -
अहिड़ा वीर मन जा साफ़ आहियूं !
झूलेलाल जा सचा उपासक -
भगत कंवर जा शाइक आहियूं !
हेमूंअ जियां ज़ान कुर्बान कंदड़-
सिंध हिंद जा वीर सपूत आहियूं !
सिन्धी आहियूं - सिन्धी सडायूं-
सिन्धी हुअण जो फखुर वठायूं!
'साज़' वजाए गडिजी पाण खे -
सिन्धी चवायूं सिन्धी चवायूं !

--दिलीप टेकचन्दाणी 'साज़'

sindhigulab@gmail.com

माउ जी दुआ

माउ जी दुआ
---डॉ ए के पंजवाणी
<ak_panjwani@hotmail.com>

मुंहिंजा बारो
जे तव्हां मूंखे
पीरसने में डिसो
उखिड़ी उखिड़ी चाल डिसो
मुश्किल महीना साल डिसो
धीरजु धरिजो
कोड़ो ढुकु ही चखी डिसिजो
उफ़ न कजो, कावड़ि न कजो
दिल मुंहिंजी खे घाउ न डिजो

हथ मुंहिंजा जे लुडण लगनि
खाधो गर किरण लगे॒
नफ़रत सां न डिसिजो
बेज़ार न थिजो
न विसारिजो
इन्हन ई हथनि सां
तव्हां खाइणु सिख्यो आ
जड॒हिं तव्हां खाधो
केराईंदा हा
खिली चुमे सीने लाईंदी हुअसि

कपड़ा बदलाइण में जे देर लगे॒ या थकु थिए
सुस्त ऐं काहिल चई वधि बीमार न कजो
न विसारिजो
केडे चाह सां
रंग बिरंगी पहिराण पहिराईंदी हुअसि
डींहं में कई बार कपड़ा बदलाईंदी हुअसि

मुंहिंजा निबल कदम जे जल्दी खजी न सघनि
हथु पकिड़िजो, न विख अगे वधाए वञिजो
न विसारिजो
आङुरि पकिड़े पेरु पेरु खणणु सिख्या हा

मुंहिंजी ई बांहुंनि में
किरी किरी उथणु सिख्या हा

गाल्हाईंदे गाल्हाईंदे जे रुकिजी वञा
वारि वारि वरजाइण लगां
विसरी वञे
माज़ीअ में विञाइजी वञा
सवलाईअ सां समझ में न अचे
उलझिजो न, नरमीअ सां समझाइजो
बेज़ार थी घबिराइजी न छिड़िबिजो

कांच जियां नाज़ुक दिल
न चूर कजो
न विसारिजो
जडहिं नंढिड़ा हुआ
सागिई कहाणी कई कई वार
बुधणु चाहींदा हा
ऐं मां कीअं प्यार सां
बार बार बुधाईंदी हुअसि
जेकी चवंदा हा
वरजाईंदी हुअसि

गर विहिंजण में देर थिए

'बू अचे थी' चई न शर्मसार कजो
न विसारिजो
नंढे हूंदे विहिंजण खां विह वेंदा हा
मां मनाइण लाइ शइ ऐं घुमाइण जा वाइदा करे

ऐं कीअं कीअं हीला करे मञाईंदी हुअसि

जे मां जल्दी समझी न सघां
वक्त खां पुठिते रहिजी वञा

मूं खे हेरत सां न डिसिजो
ठठोली न तंज कजो
मुहलत कुझु डिजो
शायदि मां कुझु सिखी सघां
न विसारिजो
सालनि जी महिनत सां
छा छा तव्हां खे सेखारियो अथमि
खाइणु पीअणु उथणु वेहणु
घुमणु फिरणु लिखणु पढ़णु
अख्यूं अख्‍युनि में विझी जग जे
तव्हां खे अगिते वधायो अथमि

खंघि मुंहिंजी जे करे
निंड जे फिटी पवे
छिड़िब न डिजो, इएं न चइजो

छा छा खाईंदी रहंदी आं
राति सजी पई खंघंदी आं
न विसारिजो
केतिरियूं रातियूं
हंज में लोडाए
सुम्हारिण लाइ
जागी काटियूं अथमि

जे मां न खावां त जो़रु न कजो
जंहिं शइ जी दिल थिए, झल न कजो
परहेज़ चई हर पल न सिकाइजो

कंहिंजो फर्ज़ु आ मूंखे रहाइण जो
हिक बिए सां बहस न कजो
बेकार पाण में न विढ़िजो
कंहिंजी का मजबूरी हुजे त
मथसि को इलज़ामु न धरिजो

जे मां हिक डींहुं चई विझां 'नमुई'
हाणि न आ चाह जीअण जी
इएं बि बोझु बणी पई आं
कोई बि हमराहु न आ
रंजु न थिजु
जीवन जो ही भेदु समझु
साल्हा साल जीअण खां पोइ आखिर
अहिड़ा डींहं बि ईंदा आहिनि
जो जीवन जोति झकी थिअण लगंदी आ
बस साहनि जी लड़ बाकी रहंदी आ
शायदि सुभाणे समझी सघीं
हिन माउ पंहिंजी खे सुञाणे सघीं
गर जीवन जी डोड़ में सभु कुझु मूं विञायो आ
पर हो जेकी दामन में मुंहिंजे
सो सारो निछावर मूं कयो आ
डिनो सचो प्यारु तव्हां खे आ

गर जे मां मरी वञां
मालिक दर दुआ कजां
'रहम अमड़ि मुंहिंजी ते कजां
जीअं कयो हो बालकपण में हुन, तूं कजां'

विसारे न छडिजो
मुंहिंजा बारो
जेसीं जान में जान आ
रवां रतु रगुनि में आ
धड़कन बाकी दिल में आ
खेरु घुरां हरदम तव्हां जोदुआ हर हिकु साहु ही मुंहिंजो

देवयाणी

देवयाणी

मूल लेखिका -डॉ मिथिलेश कुमारी मिश्र

सिन्धी अनुवाद - डॉ ध्रुव तनवानी

जंह‍ि मनु माणहुअ जो गौरव

धरती सां बधल आहे

हू माणहू महा सजण आ

हू सभ खां श्रेष्‍ठ ए वडो आ ।1

सिरष्टीअ में सचु इहो आ

माणहूअ खां वडो न कोई

उन में अण डिठी अणजाण

अदभुत समझ अथस‍ि सुतल।1

नर समझे पाण खे नारायण

उन जो इत‍िहास अनोखो आ

सुख दुख लाहीअ चाढ़ीअ में

उन जी चाल घणी गज़ब थस‍ि।1

माणहूअ जे मधुर मिलन में

कलप जी अमर आखाणी

‌‌‍ धरतीअ जे अंदर मन में

अणगणियल लिकल निशानी ।1

ठाहे साहित्य अनोखो

रसु विझी सजायो अथई

भावना जो रूप डिनो आ

रुप खे वाणी डिनी आ ।1

माणहूअ जी रचना करे

खुद पाण विधाता थियो वाहरो

करे लख हीला तब मञु

हाणे न उन जो को वसीलो।1

सतो रजो तमो जो संगम

नित जीवन जी नंढी काया

पर जसु बरफ जी चोटीअ वांगे

देवताउन बि शीशु निवायो़ ।1

हू सदा करम जो साधक

उपासक परम पिता जो

इन करो जग में फहरायो

उन जी जीत जो झंडो।1

पंहिंजे मेहनत जे ब़ल सां हू

करे सघे थो अणकयल बि

हुन सां सभु सुर्गु आ हिते

धरतीअ जी कुंड कुंड ते।1

सामीअ जा सलोक

1.

अकथु था कथिनि, साधू जन संसार में,

जिते न मारणु मन जो, तिते साथु सथिनि,

दया धारे दिलि में, सामी सारु डसिनि,

विझी नथ नथिनि, था जगियासी जे जीअ खे।

2.

अखिनि मंझि अखियूं, अठई पहर अजीब ज्यूं,

पसी पासो कान कनि, रहनि पिरेम छकियूं,

वञी पुछ तनीं खों, जोड़े जनि रखियूं,

इहा साख सखियूं, सामी डींदइ सिक जी।

जीवन - अमोलक हीरो

जीवन आहे अमोलक हीरो,

विअर्थ पोइ विञाईं छो थी?

सांवण जी हिन मस्त फिज़ा में,

गीत डुखारा गाईं छो थी?

कुदरत जी हर नइमत खे तूं,

उलझन मंझि गंवाईं छो थी?

हर मन में जे रामु रमे थो,

मंदर मढ़ियूं बणाईं छो थी?

दिलि दिलि में भगवान वसे पोइ,

दिलि कंहिंजी बि डुखाईं छो थी?

तुंहिंजी सार लहे थो साहिबु,

ग़म में पोइ घबिराईं छो थी?

सच खे त्यागे कूड़ अगियां तूं,

'देवी' कंधु झुकाईं छो थी?

-देवी नागराणी

<dnangrani@gmail.com>

चौ अखरा

1.
जवानी भूलूँ,
बुढापो हिसाब।

2.
अधूरों सुपनो,
निंड छाला ।

3.
पंहिंजो मनु,
डेली डायरी।

4.
बद भलो,
बदी बुरी।

5.
कूड़ो प्यारु,
निरिड़ -तिल्‍कु।

6.
रुठलु कुटुंब,
टुटल माला।

7.
दुनिया फैशन,
अङणु गप ।

8.
कुटुंब बि-अखियाई,
एको डांवांडोल.

9.
दोस्ती भाइपी,
दुश्मनी माइटी.

10.
महांगी दाल,
मुर्गी सवादु.

-मनोजकुमार चावला

mandieleo@rediffmail.com

. نظم

ڪڏھن حاڪم ٿي، ڪڏھن ظالم ٿي

ڪڏھن جانب ٿي ڇلُ ڪري ڪري

اھڙو ويسُ سڄڻ پيو ڌري ڌري.

ھيءُ نينھن جو ناتو نڀجي اَچي

شل قرب ڪُٺل ڪو ڀي نه بچي

اِھا آس ٿي دل ۾ تري تري.

جو منھنجي دل کي مرض لڳو

لاھي، اھڙو نه طبيب مليو

چنتا ۾ دل ٿي ڳري ڳري.

نادان ڏٺي ھيءَ دل پھنجي

مون ڪين ڏٺي اَھڙي ڪنھنجي

کِلي لُڙڪن جا ڍُڪ ڀري ڀري.

ھي ديوانن جون ڳالھيون ھِت

سمجھي ڪوئي ديوانو بس

پيو چوٽ پٿّر سان ڪري ڪري.

رسُ، رنگ ۽ روُپ جي قائل جا

دل ديويءَ جي به ته گھايل آ

پئي سورن ۾ سا ڳري ڳري.

**

جڏھن من منھجو مُرجھائي ٿو

ڄڻ چوءُڌر چمن ڪوُمائي ٿو

پوءِ ڪيئن ڪلي ڪا ٽِري ٽِري.

ڪو غربت ۾ مون شاھُ ڏِٺو

ڪو ڌن ھوندي به ڪنگالُ ڏٺو

ٿيو پينو سو پيو ڦِري ڦِري.

گلزار ۾ گُل سان خار لڳي

ھيءَ دُنياداري ڄار لڳي

ٿو وقت سان ھرڪو ھِري ھِري.

Devi nangrani

<dnangrani@gmail.com>