सिन्ध जी आंउ जा॒ई आहियां

सिन्ध जी आंउ जा॒ई आहियां

सिन्धी मुंहिंजी बो॒ली आहे
सिन्ध जी आंउ जा॒ई आहियां।
लोली माउ डि॒नी जा मूंखे
वर वर जेकर वेठी गा॒यां ।
सिन्ध जी आंउ जा॒ई आहियां।

शाद रहीं आबाद रहीं शल
मुंहिंजी सुहिणी सिन्ध सभागी॒
तुंहिंजे दुख में दुखी रहां मां
तुंहिंजी मुंहिंजी ज़िदुड़ी सागी॒
तुंहिंजे सुख में सुखी रहां मां
तुंहिंजो सुख दुख पंहिंजो भायां
सिन्ध जी आंउ जा॒ई आहियां।

चवां फखुर सां सिन्धी आहियां
सिन्धी आहे मुंहिंजी बो॒ली
खणी हंज में माउ डि॒नी हुई
जंहिं बो॒लीअ में मिठिड़ी लोली
लिखां पढ़ां सिन्धीअ में ई मां
सभ सां सिन्धीअ में गा॒ल्हायां
सिन्ध जी आंउ जा॒ई आहियां।

सिंधी गुलशन जो गुलु आहियां
जग॒ अंदर खुशबू फहिलायां
गुण गा॒ए तुंहिंजा ओ सिन्धुड़ी
हर कंहिं खे मां मीतु बणायां
सडु॒ करे संकट में 'देवी'
उन जो सिक मां सडु॒ ऊनायां।
सिन्ध जी आंउ जा॒ई आहियां।

देवी नागराणी
dnangrani@gmail.com

मुंहिंजो सुर तुंहिंजे सां प्यारा मिले जड॒हिं

1989 में दूरदर्शन पारां त्यार कयलु हिक-सिटो गीतु 'मिले सुर मेरा तुम्हारा' ज़ारी कयो व्यो हो । हिन गीत में इहा सिट उन वक्त भारत जे संविधान में शामिल सभिनी भाषाउनि में आहे। सिन्धी भाषा में इहा सिट उन वक्त जे मशहूर क्रिकेटर नरेंद्र हीरवाणीअ ते फिल्मायल आहे।

वीहनि वर्हियनि खां पोइ सागि॒यो गीतु 'ज़ूम' टी वी चैनल नएं अंदाज़ में पेश कयो आहे। हींअर इहो गीतु भारत जी कुझु भाषाउनि में ई त्यारु कयो व्यो आहे। नएं गीत में सिन्धीअ सूधो बि॒यूं कुझु भाषाऊँ शामिल कोन्हनि ।

पंहिंजी मातृभाषा सिन्धीअ खे चाहींदड़ कंहिं बि सिन्धीअ खे इहो नओं गीतु कोन वणियो हूंदो । इन जो सबूतु आहे - सिन्धियुनि जा एसएमएस, इमेल ऐं अखबारुनि जा संपादकीय। नएं गीत में सिन्धी बो॒लीअ जी सिट न हुअण सां जागरूक सिन्धियुनि में गुसो पैदा थियणु वाजिबु आहे। एसएमएस, इमेल ऐं अखबारुनि में संपादकीय ज़रीए गुसो ज़ाहिरु करे 'ज़ूम' चैनल जे खिलाफ आंदोलन हलाइण, चैनल जे बहिष्कार करण जूं गा॒ल्हियूं थियनि पेयूं?

मूं वटि हिक अहिड़े सिन्धीअ जो मैसेजु बि पहुतो आहे जंहिं जे बारे में मूंखे पक आहे त हू पंहिंजे घर में पंहिंजे बा॒रनि सां सिन्धीअ में न गा॒ल्हाइंदो आहे।हीउ यारु बि इन अन्याउ मां दुखी आहे।पर ही पंहिंजे बा॒रनि सां जेकी अन्याउ करे प्यो, उन जो संदसि खे अहसासु कोन्हे। हिन सज॒ण जे मैसेज सां मन में वीचारु आयो त जेकड॒हिं हिन गीत में सिन्धी भाषा में बि सिट हुजे हा त छा इहा सिट बु॒धी हू पंहिंजे बा॒रनि सां सिन्धी में गा॒ल्हाइणु शुरू करे हा ? छा मां हिन यार जो बहिष्कारु कयां?

अजु॒ सिन्धी बो॒लीअ जा शैदाई पहिंजे पाड़े में, पंहिंजी कालोनियुनि में सिन्धी बु॒धण लाइ सिकी प्या आहिनि। छा उहे टी वी ते कंहिं गीत जी हिक सिट सिन्धीअ में बु॒धी खुशी महसूस करणु चाहीनि था? छा कंहिं टी वी चैनल ते कुझु सेकंडनि ताईं ईंदड़ 8-10 सिन्धी शब्द असां जी भाषा खे ज़िंदह रखंदा? जेकड॒हिं इएं हुजे हा त नरेन्द्र हीरवाणीअ खे सिन्धीअ में गा॒ईंदो डि॒सी हर सिन्धी घर में सिन्धी बो॒लीअ जो वाहिपो हुजे हा। पर भारत में सिन्धियुनि जे घरनि मां सिन्धी बो॒ली इएं गुम थी वई आहे जिअं भारत मां सरस्वती नदी।

'ज़ूम' टी वी चैनल हिकु प्राइवेट टी वी चैनल आहे। उहो कोई बि प्रोग्रामु कंहिं बि भाषा में ठाहे/डे॒खारे सघे थो। असां जो हुन ते को ज़ोरु न हलंदो ।

को बि टी वी चैनल, को बि गैर सिन्धी असां जी मातृभाषा सिन्धीअ खे खतम नथो करे सघे । इहो कमु सिर्फ असां सिन्धी करे सघूं था। सिर्फ सिन्धी ई पंहिंजी मातृभाषा खे खतमु करे सघनि था ऐं इहो कमु हू खुशीअ सां कनि प्या ।

छा हाणे सिन्धी भाषा खे ज़िंदह रखण जी जिमेवारी हिक प्राइवेट टी वी चैनल ते आहे? जिनि माण्हुनि जी मातृभाषा सिन्धी हूंदे बि सिन्धी गा॒ल्हाइणु छडे॒ डि॒नी अथनि, तिनि जे खिलाफु आंदोलन हलाइण जी गा॒ल्हि कड॒हिं थी आहे? असां पाण खे केसीताईं दोखे में रखंदासीं?

असां जी भाषा खे केरु ज़िंदह रखंदो? को टी वी चैनल या असीं पाण? असां कंहिंजे खिलाफ आंदोलन कयूं?

असां खे जरूरत आहे पंहिंजे खिलाफ आंदोलन करण जी।

---------------------गोपाल हासाणी

विख-4

प्रार्थना - खीमन मूलाणी

असीं छो था खिलूँ ? -प्रो लछमण परसराम हर्दवाणी

सुकल बर्फ - गोपाल हासाणी

इएं कीअं थो थी सघे

कुझु डीं॒हं अगु॒ घर में वेठो होसि ऐं कुझु लिखी रहियो होसि त घरवारीअ घंटी बु॒धी दरवाजो खोल्यो । कंहिं सां गा॒ल्हाए यकिदमि आवाजु डि॒नाईं सांईं तव्हां सां केरु मिलण आयो आहे । मां लिखण जी टेबिल तां उथी बा॒हिर दरवाजे ते आयुसि । डि॒ठुमि त हिकु वीहें एकिवीहें सालनि जो जवानु दरवाजे ते बीठो हो । मां साणसि डां॒हुं निहारियो । हुन हिंदीअ में पुछियो राधाकृष्ण भागि॒या तव्हां आहियो । मां खेसि कंधु लोडे॒ हा कई ऐं खेसि अंदर अचण ऐं कोच ते वेहण लाइ चयो । हू अंदर अची वेठो ।

मुंहिंजी धरमपत्नी हुन लाइ बिसकेट ऐं पाणी टेबल ते रखी वई । मूं खेसि पाणी पीअण लाइ चयो । हुन पाणी पीतो ऐं टूटी फूटी सिन्धीअ ऐं हिंदीअ में चयो, मूंखे खबर पई त तव्हां सिन्धी सेखारींदा आहियो सो मां तव्हां वटि सिंधी सिखण लाइ आयो आहियाँ । संदसि नालो पुछियो, जंहिं मां मालूम थ्यो त हू सिंधीअ माउ जो सिंधी बा॒रु हो । मां खांउसि हींअ अचानक सिंधी सिखण जी चाह ऐं अञां ताईं सिंधी न अचण जो कारणु पुछियो । हुन वरी अधो गाबरी सिंधी ऐं हिन्दीअ में जवाबु डि॒नो । नंढे खां ई अंगरेजी स्कूल में दाखिल कयो वयुसि । शुरूअ खां ई ममी ऐं पपा घणे भाङे अंगरेजीअ में ऐ कड॒हिं कड॒हिं हिंदीअ में गा॒ल्हाईंदा हुआ । मुश्किल सां डा॒डी॒ ऐं डा॒डे॒ जे वातां के सिंधी अखर बु॒धण में ईंदा हुआ । घर जे वातावरण करे हू पिणि आहिस्ते आहिस्ते हिंदीअ में गा॒ल्हाइण लगा॒ । मां सुठी अंगरेजी गा॒ल्हाईंदो आहियां तंहिं करे मूंखे पाण ते फखुरु थींदो हो । किनि छोकरनि छोकरियुनि , किनि जालुनि खे जे सिंधी गा॒ल्हाईंदो बु॒धंदो होसि त खेनि पुठिते पयलु ऐं घटि समझंदो ऐं शायद नफरत बि कंदो होसि ।

मां खेसि ध्यान सां बु॒धी रहियो होसि । मूं संदसि डांहुं अजब में निहारींदे पुछियो त पोइ सिंधी सिखण जो वीचार अहिड़े माण्हूअ खे कींअं आयो । हुन कंधु हेठि झुकाईंदे जवाबु डि॒नो, दादा गा॒ल्हि हिन रीति आहे मां इंजिनीयरिंग कालेज में पढ़ंदो आहियां । हिन महिने जे पहिरें 15 डीं॒हनि में असांजी बैंगलोर में ट्रेनिंग हुई । हुन में बि॒यनि कालेजनि ऐं शहरनि मां बि कुझु शागिर्द आया हुआ ।असां अटिकल 25 शागिर्द ऐं 3 उस्ताद हुआसीं ।हिक डीं॒हुं इएं थियो त विंदुर ( एंटरटेनमेंट ) जे वक्त में उस्ताद चयो त हर हिक खे पंहिंजी मातृभाषामें हिकु गीतु बु॒धाइणो आहे ऐं सभ खां पहिरीं पाण बंगाली भाषा में नंढिड़ो पर तमामु मिठो गीतु गा॒ए बु॒धायो ।मूंखे लगो॒ त सभिनी खे थोरे ई को मातृभाषा में गीत ईंदा हूंदा । सो केतिरा गा॒ईंदा ऐं उन खां वधीक न गा॒ईंदा ।

पर मुंहिंजो अंदाजो ग़लत निकितो । सभई पंहिंजे वारे ते मातृभाषा में गीत गा॒इण लगा॒ । पोइ को पूरो गीतु त को अधूरो को तमाम सुठे सुर में भाव विभोर थी त को साधारण सुर में । पर हरको पंहिंजी मातृभाषा में गीतु गा॒ईंदो खुश पिए नज़र आयो । पहिरीं मां निश्चित हुउसि पर हाणे मुंहिंजी चिंता वधण लगी॒ । मूंखां अगु॒ हिक जर्मन ऐं हिक जापानी शागिर्द जो वारो आयो । हुननि बि पंहिंजी मातृभाषा में झूमंदे गीत गाया ।

हाणे मुंहिंजो वारो । मूंखे गा॒इण लाइ इशारो कयो । मां हको ब॒को थी वयुसि । मूं चयो त तव्हांखे हिंदी या अंग्रेजीअ में गीतु बु॒धायां । सभिनी जोर सां नो नो चयो । उनते उस्ताद चयो त ठीक आहे तोखे गीतु न थो अचे त हिकिड़ा अठ ड॒ह जुमला पंहिंजी मातृभाषा में गा॒ल्हाइ । मूं जड॒हिं शरम सां चयो त मूंखे पंहिंजी मातृभाषा सिंधीअ में गा॒ल्हाइणु न ईंदो आहे त सभिनी खे अजबु लगी॒ वयो । केतिरनि जी जुबान मां हिकदम निकतो, हाउ इट केन बी ? इएं कीअं थो थी सघे ? सभई मूं डां॒हु घूरे अजब ऐं अविश्वास में निहारे रहिया हुआ । मां शरम खां पाणी पाणी थी वयुसि । मूंखां पोइ ब॒ ज॒णा बि॒या हुआ । उन्हनि पिणि तमिल ऐं कछी बो॒लीअ में गीतु गा॒तो ।

कार्यक्रम पूरो थ्यो पर मूंखे लगो॒ मां सभिनि जो डो॒ही आहियां ऐं सभई अख्यूं मूंखे घूरे निहारे रहि‍यूं आहिनि । बाकी ट्रेनिंग जे डीं॒हनि में कुझु शागिर्द खास मूंसां गडि॒जण आया ऐं पुछण लगा॒ त सचु पचु मूंखे पंहिंजी मातृभाषा न ईंदी आहे । हू इन गा॒ल्हि ते विश्वास न कंदे चवनि प्या, 'इएं कींअ थो थी सघे ?'

उन डीं॒हं जी उन बेइजती ऐं दुख मां पैदा थियल गैरत मां मूं पको कयो त मां पहिरियों कमु कंदुसि त वञी सिंधी सिखंदुसि ।घर अची किनि खां पुछा कई । उन्हनि बु॒धायो त तव्हां सिंधी सेखारींदा आहियो सो तव्हां वटां सिंधी सिखण आयो आहियां ।

मूं प्यार मां संदसि मथे ते ऐं पुठीअ ते हथु फेरींदे चयो पुट का बि चिंता जी गा॒ल्हि कान्हे । देर आयो दुरस्त आयो । मां तोखे 15 डीं॒हनि में सिंधी सेखारींदुसि । हू खुश थी वयो । बि॒ए डीं॒हं खां ई सिंधी सिखण अचण लगो॒ । बा॒रु तमामु होशियार हो । संदसि गैरत हुन में जान फूकण जो कमु करे रही हुई । हू खूब महिनत करण लगो॒ । ड॒हनि डीं॒हनि अंदर ई हू सिंधी गा॒ल्हाइणु, पढणु ऐं के कदुर लिखणु सिखी वयो । में खांउसि पुछियो पुट छा ड॒हनि डीं॒हनि में केरु सिंधी सिखी थो सघे ?

खुशीअ मां मुस्कराईंदे जवाबु डि॒नाईं, 'हा इएं थी थो सघे ।'
---------------------------राधाकृष्ण भागि॒या , मुंबई

नौजवान पीढ़ी ऐं सिन्धियत जी हलचल

• मां डि॒सी रहियो आहियां त असां जी सुजागु॒ ऐं बु॒धीमानु नौजवान पीढ़ी पंहिंजी सिन्धी भाषा, साहित्य ऐं संस्कृतीअ खे ज़िदह रखण लाइ सरगरमु थी रही आहे ।


• इहा फखुर जी गा॒ल्हि आहे त नौजवान पीढ़ीअ में पंहिंजी सांस्कृतिक विरासत खे सहेड़ण लाइ नईं चेतना जागी॒ रही आहे ऐं हू पंहिंज्युनि जड़ुनि सां जुड़ण जी कोशिश करे रही आहे ।


• भारत जे शहर-शहर में नयुनि युवा संस्थाउनि जो बर्पा थियणु, माहवार, टिमाही ऐं साल्यानी पत्रिकाउनि ऐं स्मारिकाउनि जो प्रकाशनु ऐं सांस्कृतिक कार्यक्रमनि जी धूम इन हकीक़त जो सबूतु आहे ।


• अजु॒ जड॒हिं गैर समाजी अनासर ( असामाजिक तत्व ) सिन्धी समाज ते बेबुन्याद ऐं बेहूदा इल्ज़ाम हणी बदनाम करण जी साजिश रचीनि था ( हवालो इंडिया टुडे वगैरह ) त समूरो सिन्धी समाज , खासि करे नौजवान तबिको, उनजी ज़ोरदार निंदा ऐं विरोधु करण लाइ यकमुश्त थी वञे थो ।


• राष्ट्रगीत में 'सिन्ध' अखरु हटाइण जे सुवाल ते सिन्धी समाज जे नाराज़िपे (आक्रोश) जो ज्वालामुखी फुटी पियो । चइनि तर्फनि खां विरोध जा सुर गुंजण लगा॒ । विदेश जे सिन्धियुनि बि गुसे जो इज़हारु कयो । पंहिंजे वर्से (विरासत) जे बचाव लाइ हज़ारें हथ मथे उथिया । एकता जे इन मुजा़हिरे (प्रदर्शन) दिलि खे गदगदि करे छडि॒यो
• इहा जाग्रिती ऐं सुजागी॒ डि॒सी मुंहिंजो विश्वासु अञा बि पुख्तो थी वेन्दो आहे त सिन्धी समाज बेजानु या घोर निंड में सुतलु कोन्हे, बल्कि हू पंहिंजो शानु ऐं स्वाभिमानु, पंहिंजी सुञाणप ऐं वुजूदु काइमु रखण लाइ सुजागु॒ रही, कशमकश कंदो रहे थो ।


• असांजे नौजवाननि जो होसिलो हमेशा बुलंदु रहे, इन्हीअ शुभकामना सां मां उन्हनि सभिनी समर्पित युवा साथियुनि जो अभिनंदनु करियां थो जेके पंहिंजनि हथनि में 'सिन्धियत जो झंडो' सोघो झले, पंहिंजी मंज़िल-मक्‍सद डां॒हुं वधंदे, अहिमु भूमिका निभाइण जी कोशिश करे रहिया आहिनि ।


• नौजवाननि खे इहा गा॒ल्हि यादि रखणु घुरिजे त अगि॒ते हली खेनि ई सिन्धियत जी हलचल जी अगु॒वानी करिणी आहे । इन लाइ खेनि हींअर खां ई वठी सिन्धू सभ्यता, संस्कृती , लोक कला, इतिहास, साहित्य ऐं भाषा सां वास्तो रखंदड़ु समूरो ज्ञानु हासुलु करे माहिरु ऐं काबिलु बणिजण जी ज़दोजहद करिणी पवंदी, जीअं हू ईंदड़ पीढ़ीअ जी रहनुमाई करे सघनि ।


• नौजवान पीढ़ी सिन्धी कौम जे आइंदे जो आधारु आहे , करंधे जो हडो॒ आहे जेकड॒हिं हूअ पंहिंजे फर्ज खां गुथी त पोइ सिन्धियत जे वण जी टारी-टारी, पनु-पनु, टिड़ी-पखिड़िजी वेन्दो । अहिड़ीअ तरह असांजो वुजूदु ई खतमु थी वेन्दो ऐं इन जी जिमेदारु नौजवान पीढ़ी ई थींदी ।


• यादि रहे त असांजे बुजु़र्गनि कष्ट-कशाला सही, पंहिंजो रतु सतु डे॒ई, सिन्धियत जे गुलिस्तान खे सरसब्‍ज़ु रख्यो आहे । हाणे उहे माल्ही आहिस्ते आहीस्ते रमंदा पिया वञनि । इन खां पोइ नौजवान पीढ़ीअ जे प्रतिभाशाली ऐं उर्जावान शख्सनि खे ई सिन्धियत जी मशाल हथनि में झले, मुश्कलातुनि ऐं आपदाउनि जे अंधेरे खे चीरींदे, स्वाभिमान ऐं आत्मविश्वास सां अगि॒ते कदमु वधाइणो पवंदो ।


• असांजो नारो हुअणु घुरिजे: ' असीं सिन्धी-सदाईं गडु॒ ।'


• हिन्दी साहित्यकार जयशंकर प्रसाद चयो आहे : ' जेका जाती जेसिताईं मरण लाइ तयारु रहंदी, उनखे तेसिताईं हिन धरतीअ ते जीअण जो अधिकारु रहंदो ।

---------------------------वासुदेव 'सिन्धु-भारती', जयपुर

सि‍न्धियुनि लाइ हिक सुठी खबर

हेठीं वेबसाइट तां देवनागरी ऐं अरबी लिपीअ जो सिन्धी यूनिकोड कीबोर्ड ऐं फाँट डाउनलोड करे सवलाइअ सां वर्ड, मेल ऐं ब्लॉग ते सिन्धीअ में लिखी सघो था ।
http://www.ildc.gov.in

सिन्धीअ जी सुञाणप

• सिन्धी बो॒ली ई सिन्धियुनि जी सुञाणप आहे।
• भारत जे संविधान में सिन्धीअ जो कंहिं जातीअ जे रूप में वर्णन कोन्हे । भारत जे संविधान जे अनूसार सिन्धी उहो आहे जेको सिन्धी गा॒ल्हाए थो।
• सिन्धी समाज हिक भाषाई समाज आहे । सिन्धी न का जाति आहे न धरमु
• असीं तेसींताईं सिन्धी आहियूं जेसींताईं सिन्धी गा॒ल्हायूं था ।
• असांजी प्राचीन संस्कृतीअ जी सुञाणप बि असांजी मातृभाषा सां आहे ।
• समूरी दुनिया में हर भाषा ऐं हर स्कूल में सिन्धू घाटी सभ्यता जे बारे में पढ़ायो वञे थो । असीं सिन्धी इन सभ्यता जा वारिस आहियूं ।
• जेकड॒हिं अव्हां पाण में सिन्धीअ में गा॒ल्हाईंदा त गु॒झियूं गा॒ल्हियूं बि॒या समझी न सघंदा।
• बि॒यूं बो॒लियूं जेतिरियूं सिखिजनि बहतर, पर पंहिंजी मातृभाषा खे विसारणु न घुरिजे । इहा पहिरीं सिखणु घुरिजे ।
• टिड़ियल, पखिड़ियल, विखिड़ियल सिन्धी समाज खे पंहिंजी मातृभाषा ई माल्हा जियां पिरोए सघे थी ।
• सिन्धियत जी हिफाजत लाइ पंहिंजे रस्मुनि रिवाज़नि खां मुंहुं न मोड़ियो, पर वक्त ब वक्त मल्हायो।
• सिन्धी बो॒लीअ खे काइमु रखण जो सिर्फ हिकु इ तरीको आहे- पंहिंजे बा॒रनि सां सिन्धीअ में गा॒ल्हाइणु ।
• वैज्ञानिकनि सिद्ध कयो आहे त बा॒रु जेतिरियूं वधीक भाषाऊं सिखंदो, हुनजो दिमाग़ ओतिरो तेजु़ थींदो ।